El Gobiernu d’Asturies alza la voz pola igualdá nel deporte cola segunda xornada de Muyer y Deporte en La Morgal. L’eventu forma parte del programa ADN. Asturies, Deporte y Naturaleza, dientro de les actividaes de la distinción como Rexón Europea del Deporte 2025. Fonte: Actualidá Asturies /
La próxima convocatoria de subvenciones para clubes que compiten n’alto nivel, dotaes con un millón, va incluyir a los bolos y la natación afecha.
La Conseyería de Cultura, Política Llingüística y Deporte celebró esti domingu nel Centru de Deportes de La Morgal, en Llanera, la segunda xornada Muyer y Deporte. Esti eventu rexuntó a muyeres mayores de 35 años n’una mañana llena de convivencia, actividá física y aprendizaxe en 15 disciplines deportives, dende’l fútbol hasta la esgrima. La conseyería detectó que se tán dando meyores n’igualdá en disciplines como’l balonmano, el surf o la natación.
La xornada que nació l’añu pasáu, tien como oxetivu promocionar de forma lúdica’l deporte ente muyeres mayores de 35 años. Esta iniciativa, enmarcada nel programa ADN. Asturies, Deporte y Naturaleza, refuerza’l compromisu del Principáu como Rexón Europea del Deporte 2025, apostando pol bienestar, la igualdá y la cohesión social al traviés del exerciciu.
Mientres l’eventu, la conseyera Vanessa Gutiérrez anunció que’l Principáu va aprobar llueu un millón en subvenciones pa clubes que participen en competiciones d’altu nivel. Como novedá, esta edición va incluyir les modalidaes de bolos y natación afecha.
La conseyera Vanessa Gutiérrez destacó les meyores n’igualdá en delles disciplines deportives nel Principáu. Un informe del so departamentu revela que’l balonmano ye una de les práctiques más igualitaries, con más del 50 % de federaes y xuna creciente participación femenina na adolescencia. La natación y el surf tamién sobresalen, con ratios d’entrenadores cercanes al 50 %.
Sicasí, persiste una menor tasa de práctica deportiva federada ente muyeres y neñes, tanto nel global como na mayoría de les disciplines. La fienda tamién se repara nel númberu d’entrenadores y na presencia nos comités deportivos.
Nesti sentíu, la conseyera sorrayó la necesidá de siguir trabayando pola igualdá nel deporte y recordó el recién episodiu d’ataques a xugadores menores d’edá del Xixón Fútbol Femenino, a quien repitió’l so sofitu y condergó los fechos de forma tayante. Gutiérrez anunció que se tán estudiando cambeos na normativa de los Xuegos Deportivos pa prevenir situaciones similares y destacó “el comportamientu exemplar del club xixonés y de les families nuna situación bien grave, énte la cual toles instituciones y entidaes tenemos de comprometenos para erradicar la violencia y la discriminación nel deporte, especialmente nel deporte base”.
Compromisu col deporte de persones con discapacidá
Esti domingu, la conseyera asistió al Campeonatu d’España de Mozos de Boccia, celebráu nel Centru Deportivu de Llangréu Juan Carlos Beiro. La prueba cuntó con una amplia participación de deportistes asturianos, destacando Unai Soares, quien se llevó una medaya de bronce.
Mientres la so visita, Gutiérrez resaltó’l papel fundamental de FEDEMA, que xunto al Gobiernu d’Asturies ta desenvolviendo programes de tecnificación deportiva en natación afecha, ente otros proyectos, nel mesmu equipamientu.
