- Fonte: Nortes.me / Ismael Juárez Pérez
Escuela de Teitáu: restaurando’l patrimoniu asturianu teito a teito. Un proyectu singular y autoxestionáu recupera y restaura unu de los emblemes de l’arquitectura tradicional.
La Escuela de Teitáu ye un proyectu singular y autoxestionáu que busca rescatar y caltener una tradición asturiana bien especial: los teitos. Estes cabanes tradicionales de piedra con cubiertes vexetales son auténtiques cápsules del tiempu, testigos d’una tradición qu’aguanta al abandonu y la burocracia. Asitiaos principalmente en Somiedu y Teberga, conceyos protexíos pola so riqueza natural, los teitos reflexen una manera sostenible y ancestral de xestionar el territoriu que perduró mientres sieglos.
Para José Álvarez, diseñador industrial, axitador cultural, rexente de la Tabierna Narcisu y unu de los fundadores de la escuela, estos abelugos tradicionales tienen daqué especial: “Nun son solo cases, son como seres vivos que nacen, viven y muerren d’una manera bien particular. Cuando un teito deteriórase, floria, conviértese amodo en compost y casi siempres termina per brotar un árbol dientro. Ye un ciclu bastante románticu”, comenta.
Precisamente esta sensibilidá especial escontra los teitos impulsó xuntu al arquiteutu Macario Iglesias la creación de la Escuela de Teitáu. Un equipu al que se fueron incorporando l’etnógrafu Armando Graña, el canteru Roberto Puertes y otres persones venceyaes a l’arquitectura tradicional asturiana.
José Álvarez restaurando un teito. Semeya: @lys Arango.
La escuela como abelugu de tradición. La idea surdió d’una esperiencia personal. Jose cunta cómo, cuando tenía 12 años, vio esbarrumbase un teito familiar. Munchos años dempués, llogró recuperar la finca familiar y decidió restaurar el teito coles sos propies manos. Mientres ese proceso conoció a Macario Iglesias, arquiteutu, artesanu de la bioconstrucción y collaborador habitual del Museu del Pueblu d’Asturies y del Ecomuséu de los teitos de Somiedu.
“Con Macario aprendí técniques escaecíes, como trabayar ensin cementu, utilizando folla y trenzado d’ablanar. Él yá daba cursos de bioconstrucción y xuntos decidimos tresformar esta idea en daqué más grande”, esplica Jose. Asina nació Teitáu, coles mires de restaurar un teito cada añu y enseñar les técniques tradicionales a tou aquel comenenciudu.
La escuela convirtióse asina en motor de caltenimientu de los teitos n’Asturies. Non solo restaura estructures antigües, sinón que busca xenerar conciencia comuñal sobro’l valor cultural d’estes construcciones tradicionales.
En países como Gran Bretaña, Irlanda, Francia, Holanda o Dinamarca, esti tipu d’arquitectura inda se valora descomanadamente. Ellí, les cubiertes vexetales son símbolu de prestíu y esisten redes profesionales bien establecíes dedicaes al so caltenimientu y rehabilitación
Más qu’arquitectura, memoria colectiva. Los teitos representen muncho más que simples construcciones rurales. Tán íntimamente amestaos a les brañes altes, zones onde los habitantes de los pueblos xubíen pel branu p’aprovechar camperes fresques. Les cabanes de teito son edificaciones de piedra con cubierta vexetal construyíes nestos poblaos branizos. Nel so interior, distribuyise en dos niveles: la planta baxa funcionaba como cuadra pa les vaques, y el nivel cimeru, so la cubierta, emplegábase como payar p’almacenar la yerba seco. Dalgunes inclusive disponíen d’una pequena habitación pal pastor. Estes construcciones son reflexu d’una forma de vida respetuosa y fondamente conectada cola redolada, caltenida mientres xeneraciones.
Braña La Pornacal, Somiedu. (Fotografia de 1982 d’Ástur Parés)
Dende’l puntu de vista constructivu, los teitos son especialmente singulares. La so cubierta realizase con escoba, xuna variedá local de retama recoyida nel monte, ente que los murios llevántense con piedra seca, ensin nengún tipu d’argamasa, y l’estructura de madera nun emplegaba uniones metáliques. Más allá del so valor arquitectónicu, formen parte d’un paisaxe etnográfico de gran riqueza: un microcosmos cultural que perduró casi inalteráu nel tiempu, espresión viva de la cultura popular del monte asturianu.
Los teitos n’Asturies enmárquense dientro d’una tradición europea más amplia de cubiertes vexetales. En países como Gran Bretaña, Irlanda, Francia, Holanda o Dinamarca, esti tipu d’arquitectura inda se valora descomanadamente. Ellí, les cubiertes vexetales son símbolu de prestíu y esisten redes profesionales bien establecíes dedicaes al so caltenimientu y rehabilitación.
Dinamarca.
Islandia
Gran Bretaña
Mientres n’otres rexones europees esti tipu de viviendes acomuñense al luxu o al estatus, n’Asturies mientres muncho tiempu venceyarense a la probeza y la vida rural más dura. José recuerda que “yera un espaciu de llibertá, alloñáu de les tensiones sociales impuestes pola Ilesia o los señores feudales: Les brañes yeren llugares d’alcuentru, convivencia y frontera cultural”.
La escuela n’acción. El mesmu términu *teito zarra tamién xuna hestoria que conecta llingua y paisaxe. Jose cunta qu’esisten distintes teoríes sobro’l so orixe. Dalgunos consideren que la palabra vien directamente de techu, ente qu’otros sostienen lo contrario: que foi’l nome de la planta —la escoba o *retama usada pa cubrir— lo que dio llugar al nome del teyáu. Sía como quier l’orixe real, lo cierto ye que’l vocablu *teito non solo noma xuna estructura, sinón que remite a tou un universu de saberes rurales, formes de vida y relación íntima cola redolada.
L’añu pasáu, n’unu d’estos cursos participaron catorce arquitectes de la Universidá d’Alcalá d’Henares, lo que reflexa un interés creciente más allá de les fronteres asturianes
La comunidá como base del cambéu La dinámica de la Escuela de Teitáu depende totalmente de la participación comuñal. Entámense xornaes de trabayu colectivu pa preparar la restauración integral de cada teito. Amás, cada branu imparten cursos intensivos onde hasta dolce persones, munches provenientes de Francia, Madrid, Cataluña o País Vascu, conviven y trabayen mientres xuna selmana entera na restauración.
“Lo interesante ye que nun precises tener un teito propiu pa contribuyir. Ye un tipu d’activismu comuñal que va más allá del aprendizaxe técnicu. Realmente tas contribuyendo a caltener vivu’l patrimoniu”, apunta Jose. L’añu pasáu, n’unu d’estos cursos participaron catorce arquitectes de la Universidá d’Alcalá d’Henares, lo que reflexa un interés creciente más allá de les fronteres asturianes.
Unu de los teitos interveníos.
Alministración frente a los teitos n’Asturies
Sicasí, non tou ye senciellu. José señala abiertamente la falta de sofitu efectivu per parte de l’alministración: “L’alministración llindase a inventariar los teitos n’Asturies, pero nun facilita’l so caltenimientu. En terrenes comunales ta directamente prohibíu restauralos por tar fuera d’ordenación urbana”.
Pa él, el problema va más allá de les construcciones: “Trátase de decidir si queremos realmente caltener viva la ganadería estensiva, si queremos pueblos habitaos por persones arguyoses del so estilu de vida, o si a cencielles preferimos un modelu turísticu vacíu de conteníu”.
Macario Iglesias. Semeya: @#lis Arango.
Una situación crítica en Somiedu y Teberga. La situación actual de los teitos n’Asturies ye esmolecedor. José Alberto calcula qu’en Somiedu y Teberga queden apenes cien teitos en bon estáu, cayendo ente diez y venti cada añu debíu al avieyamientu de los sos propietarios y l’ausencia de relevu xeneracional. La función orixinal d’estos abelugos –el cuidu del ganáu pel branu– ye güei económicamente invidable, dexando estos edificios vulnerables al olvidu y al deterioru.
Folixa de la Escuela. Nel occidente asturianu, onde s’utilicen teitos de centenu, la situación ye entá peor: “El centenu yá nun se llanta y estos teitos tán en peligru críticu de sumir por completu”, alerta.
A la fin, los teitos n’Asturies permanecen como testigos silenciosos d’una manera de vida ancestral, símbolu d’una resistencia cultural y de una identidá asturiana fonda y xenuina. Jose Álvarez conclúi, con un tonu de poesía senciella, que resume l’espíritu d’estos abelugos tradicionales:
“Los teitos, más que techos, son pequenes cápsules del tiempu. Son vida, memoria y resistencia. Cuando se deterioren, nun muerren, tresfórmense amodo en naturaleza otra vegada, cerrando asina un ciclu qu’empezó sieglos tras, a lo cimero de los montes asturianos.”
