María José Hevia reflexona al rodiu la figura del tambor na pareya que forma cola gaita y la so importancia na cultura tradicional asturiana.
María José Hevia: «El tamboriteru y el vasu sidre»
Semeya d’Angela Franceschi Art
Un vasu sidre ye parte importante de la cultura sidrera n’Asturies. Falo del recipiente ensin bebida, de la ferramienta pa beber la sidre; del oxetu icónicu que, de siempre, se dibuxa baxo la botella que vierte un chorrín de líquidu mariellu qu’espalma enriba’l cristal. Pero’l vasu sidre nun figura nel títulu de la causa qu’algamó la consideración de Patrimoniu Cultural Inmaterial de la Humanidá que concedió la UNESCO a la ‘Cultura Sidrera Asturiana’.
Al empar podemos concluir, a la vista de les últimes noticies sobre la iniciativa de nomar a la ‘Gaita Asturiana’ o a la ‘Cultura de la Gaita Asturiana’ como Bien d’Interés Cultural que’l tambor asturianu ye a la ‘Cultura Gaitera’ lo que’l vasu sidre a la ‘Cultura Sidrera’. Ye’l cacharru que marca’l ritmu cuando suena la gaita, l’oxetu icónicu que, de siempre, se dibuxa baxo una gaita que ta más enriba, con flecos colgando del roncón. Pero’l tambor nun figura nel títulu de la causa que busca’l reconocimientu de Bien d’Interés Cultural que, nun mos engañemos, ye una distinción a nivel nacional, nada que ver cola anterior.
«El tambor ye’l cacharru que marca’l ritmu cuando suena la gaita, l’oxetu icónicu que, de siempre, se dibuxa baxo una gaita que ta más enriba. Pero nun figura nel títulu de la causa que busca’l reconocimientu de Bien d’Interés Cultural»
El protagonismu de la gaita como solista ye indiscutible. Les metes algamaes nos últimos tiempos faen que l’instrumentu seya consideráu, incluso, nos conservatorios de música. Pero otros finxos, distintos y tamién importantes, algamáronlos yá gaiteros como Lliberdón o Remis en tiempos remotos onde’l folclore en xeneral, non namás la gaita, llegaba a tolos públicos y taba de moda. Namás hai que recordar los llenazos qu’había nel Entoldáu de Xixón pa ver baillar rapacinos o sentir tonada asturiana. Dende l’entamu del sieglu XX hasta los años 80, pal públicu en xeneral, la gaita yera inseparable del tambor. Nun había cartelu de romería nel que nun s’anunciara “misa solemne con gaita y tambor” o “misa solemne con tambor y gaita”. Como reza’l dichu: “Los d’Uviéu, tambor y gaita… Los d’alredor, gaita y tambor”. L’instrumentu qu’identifica a Asturies nun ye la gaita solista. Ye’l binomiu de gaita y tambor, porque de gaites ta’l mundu llenu. Lo que marca la diferencia nel nuesu territoriu ye, precisamente, que los dos van de la mano.
«L’instrumentu qu’identifica a Asturies nun ye la gaita solista. Ye’l binomiu de gaita y tambor, porque de gaites ta’l mundu llenu»
N’Asturies, el tambor ye un instrumentu poderosu que, va décades, La Mariñana facía sonar, ensin techu cristal y a vegaes en solitario, en desfiles interminables énte los Mariñanes; tan poderosu que Serafín, el redoblante de Quintes, impresionaba con un virtuosu solo enriba’l parche cabritu. Sabino Cifuentes, el mio mayestru tamboriteru, diba delles vegaes a tocar col mio hermanu. Yeren tiempos nos que nos “repartíamos” pa que, polo menos, fuera un Hevia a cada pueblu cuando coincidíen dos fiestes na mesma fecha, y nun se picaren los de les comisiones de fiestes. Cuéntame José Ángel qu’entamaba un pasucáis y, cuando nun llevaben nin diez metros andaos, Sabino facía un redoble obligando al mio hermanu a facer una escala pa finar. “¿Qué pasa, Sabino?” “Na, que vamos parar un poco”. Esti tamboriteru mandaba y teníamoslu en gran estima.
Pero nestos tiempos el tambor y los tamboriteros tamos sufriendo l’escaezu. Nun sé si ye por falta de tamboriteros tradicionales o porque pensamos qu’esi acompañamientu rítmicu yá nun fai falta; pasamos de pasucáis con gaita y tambor a banda gaites, grupín de gaites y, de sópitu, a gaiteru ensin tamboriteru nuna fiesta mayor.
«Nestos tiempos el tambor y los tamboriteros tamos sufriendo l’escaezu. Pasamos de pasucáis con gaita y tambor a banda gaites, grupín de gaites y, de sópitu, a gaiteru ensin tamboriteru nuna fiesta mayor»
La consideración de Gaita y Tambor quedó entós pa una época na que los tamboriteros díbamos fraseando col tambor lo que facía la gaita. Despertábamos xuntos a la xente cola alborada y sonábamos pasucáis onde nun había más que caleyes; siguíemos con mises y procesiones, y dempués de la puya’l ramu requintábamos y repicábamos pa que nun-yos costara saltar a los del baille. Lo que venía a ser una pareya de gaita y tambor que teníen salío bien temprano de casa col traxe llimpiu, plancháu, colos preseos preparaos, y tornaben tarde coles medies manchaes de Servus de rozar los zapatos escontra los todiellos.
«Los tamboriteros d’eses pareyes nun merecemos el despreciu d’escaecenos de la historia que yá pasó y de la que toos xuntos podríamos escribir»
Los tamboriteros d’eses pareyes, los que yá morrieron, y otros qu’entovía marcamos el ritmu col tambor al son de la gaita, nun merecemos el despreciu d’escaecenos de la historia que yá pasó y de la que toos xuntos podríamos escribir. Eso sedría discriminación.
