Atropellu mortal en Villaviciosa d’unu de los animales más bellos de la fauna asturiana. La escasa visión fai-y bien vulnerable al cruciar carreteres y caminos.
- Fonte: LNE / Asturies.com /
Un exemplar adultu de melandru foi atopáu atropelláu na cuneta de la carretera que xune Oles con Tazones, sosprendiendo a los conductores que transiten pela zona. Conocíu n’Asturies como melandru o melendru, esti mustélidu esperimentó un notable aumentu de población nos últimos años en Villaviciosa. Sicasí, la so escasa visión failo especialmente vulnerable al cruciar carreteres y caminos, lo qu’amonta’l riesgu d’atropellos.
Históricamente, el melandru foi escorríu tantu pola so piel como polos daños que causa en cultivos, especialmente en tierres de maíz. Animal de vezos nocherniegos, habita en fondes llurigues, onde cría a los sos retueyos y almacena alimentu. La dómina de reproducción empieza agora en primavera, cuando la fema queda preñada. Tres una xestación d’aprosimao siete selmanes, suel dar a lluz ente dos y cuatro críes, que nacen en primavera o branu.
El Melandru/ Pablo R. Guardado
El Meles meles ye’l nome científicu del melandru, mamíferu carnívoru de tamañu pequeñu, de pelo llargo y de color blanco y prieto que se pue ver nos montes d’Asturies. Esti animal vive per toda Europa, cola esceición única de tierres ártiques.
Ye de la familia de los mustélidos, al igual que mustadielles, papalbes, gulos, grisones, furones, fuines, visones, mofetes y llóndrigues. Éstos animales habiten en medios terrestres y acuáticos, tando’l melandru nel primer grupu.
Dibuxu d’un melandru.
El melandru trátase d’un animal de costumes mayormente nocherniegues con una alimentación basada en pequeños mamíferos, páxaros, insectos, llimiagos, frutos o miel. Son monógamos, viven en madrigueres y tán especialmente activos cola llegada de la primavera, cuando aparien.
La especie europea, la qu’habita Asturies, tien un tamañu na so etapa adulta d’unos 80 centímetros de llargor y 35 d’altor. La cabeza ye allargada y cuenta con garres pa poder escarbar la tierra en busca d’alimentu.
Melandru.
Cuenten col sentíu del olfatu y l’oyíu mui desarrollaos, non asina’l de la vista por mor de los sos vezos nocherniegos. D’ehí qu’en munchos cuentos y dibuxos animaos infantiles se-yos represente como personaxes que ven mal.
Los depredadores del melandru son otros mamíferos de más tamañu, como los osos, los llobos o los raposos, sobre manera de los exemplares más mozos. Tamién tienen a esti mustélidu como alimentu les aves rapaces
