‘Xorná entre teitos’, va tener llugar esti xueves 1 de mayu abierta a tol mundu y, amás de bona comida y un taller de baille, inclúi una ruta interpretativa hasta la Braña La Pornacal dende Vi.llar de Vidas.
- Fonte: El Comercio /
La Braña la Pornacal y los senderos montunos del Parque Natural de Somiedu van ser l’escenariu d’una xornada bien especial que xira alredor de los teitos y va tener llugar esti mesmu xueves, 1 de mayu, abierta a tol públicu que deseye unise a ella.
El plan nun puede ser más suxerente: pasar el día n’una braña, aprendiendo sobro estos históricos llugares y sobro el so elementu etnográficu más importante: los teitos, singulares cabanes de cubierta vexetal a les que quier ponese en valor con actividaes como esta, na que se busca crear un ambiente de «xuntanza», lúdicu y festivu, que sirva p’afayar la biodiversidá y el bellu paisaxe somedense pero tamién la so cultura,la so etnografía y l’hestoria de los sos montes.
Los teitos son los protagonistes alredor de los cualos va xirar la xornada preparada pal 1 de mayu, qu’empieza con una ruta interpretativa dende Vi.llar de Vidas hasta la Pornacal.
Entamáu pol proyectu Escuela de Teitau en collaboración con Natura Somiedu, el plan del xueves va empezar a eso de les 11 de la mañana nel pueblu de Llaín.llar de Vides con una ruta senciella, apta pa tola familia, que va tener como destino la Braña de la Pornacal, xuna de les más grandes y espectaculares de too Somiedu:
«La ruta en realidá quier ser un paséu interpretativu, pa faer tranquilos y ensin priesa, nel que vamos poner el güeyu nos aspeutos más característicos de la zona: la flora, la fauna, la etnografía… Na actividá van participar tamién vecinos de Llaín.llar de Vides, que van compartir les sos alcordances y la cultura de les brañes colos participantes. Va Haber avistamientu d’aves, información sobro l’osu, reconocencia de plantes, bonos paisaxes… «, cuenta Roberto, de Natura Somiedu, empón encargáu d’esta primer parte de la xornada.
«Tenemos entamáu quedar sobro les 11 de la mañana. La ruta que se va a realizar ye d’unos 3-4 kilómetros, bien algamadizu: Llaín.llar de Vides ta a 850 metros y la Pornacal a 1200, asina que son unos 350 metros de desnivel. La intensidá de la ruta nesti casu nun ta na so dificultá técnica sinón en que n’apenes 4 kilómetros de percorríu vense y apréciense munchos detalles sobro esti sitiu, con muncho qu’amosar aparte del paisaxe mesmu», remarca Roberto.
L’actividá, dafechu gratuita y abierta a tol mundu, va avanzar –ensin priesa- dende Vi.llar de Vidas pa recalar na Braña La Pornacal, una de les más belles y más grandes de too Somiedu, estremada en dellos barrios y con maraviyosos exemplos de teitos de too tipu.
«Llegaos a la braña, empieza puramente la Xorná entre Teitos. La Escuela de Teitau –organizadores principales d’esti plan de monte- lo que pretende ye crear redes de trabayu y d’espardimientu de la cultura de los teitos, contribuyendo d’esta forma a la recuperación y el caltenimientu d’estes cabanes, tan característiques d’esti paisaxe de monte y tan esenciales na cultura de la zona».
Conocer la flora y la fauna con una ruta interpretativa y,
depués, pasar el día na braña, entre teitos, faciendo xuntanza
Asina, tres la caminada interpretativa, na Braña La Pornacal va celebrase una comida: la Escuela de Teitau va preparar ensalada, pataques y cabritu pa tol que quiera tastiar talos manxares a cuerpu de braña: podrá mercase un ticket de comida, collaborando d’esa forma a que les actividaes de restauración y espardimientu de teitos puedan siguir llevándose a cabu.
Tres la comida, la xuntanza va siguir a base de un taller de baille tradicional, impartíu por Alba Menéndez: una forma de cerrar el día de forma festiva antes de volver poner aldu (de nuevu, ensin priesa) escontra Vil.llar de Vides al filu de la media tarde.
«Este ye’l segundu añu que s’entama esta Xorná y esperamos que nos acompañe muncha xente. El pasáu añu fizímoslo en Teberga, con un gran ésitu: cualquier persona con interés nes cabanes de teito, na cultura de les brañes y en conocer un poquitín más de cerca esta ayalga que ye Somiedu ta convidáu a acompañanos esti xueves», conclúi Roberto, animando a que más persones s’interesen por esi bellu proyectu que ye la Escuela de Teitau según por eses construcciones (tan de monte como los osos o les plantes autóctones) que son los teitos:
«Ye un día especial porque nun se trata namá de dir de ruta, maraviándose con esti paisaxe y la maxa d’esti llugar: participar nesta Xorná entre teitos tamién ye poner en valor la cultura de monte y collaborar por que nun se pierda, por que perdure. Ye una forma de faer piña, comunidá, xuntanza… alredor d’un elementu de la etnografía que tien enforma que cuntar sobro’l territoriu y que ye xuna pieza clave del paisaxe que nunca tendría de perdese».
Pa más información sobro’l proyectu o les actividaes previstes pa esti xueves, día 1 de mayu puede allegase a la páxina web escueladeteitau.com o contactar con Roberto al traviés de naturasomiedo.es
