- Fonte: LNE /
«Guardián Rural» ye’l títulu que va llograr esti sábadu’l madreñeru xubiláu Raúl Martínez González, de la fábrica de madreñes Virxe de los Remedios, de la localidá canguesa de Pambley. «Empresta que s’alcuerden d’unu». L’asociación Fuentes del Narcea homenaxa’l llabor de caltenimientu de la tradición na fábrica de Pambley, la única d’Asturies na actualidá.
Va Recibir l’homenaxe de l’asociación de turismu rural Fontes del Narcea nel zarru de la sesta edición del so Festival d’Ecoturismo en Peligru d’Estinción como reconocencia al so llabor como maestru madreñeru, un saber que supo tresmitir al so fíu, Raúl Martínez Rodríguez, quien caltien activa la única fábrica d’Asturies d’esti calzáu tradicional, bien valoráu pola so capacidá para caltener los pies aisllaos del fríu y el mugor.
Dende 1966 lleva faciendo madreñes Raúl Martínez y entá nun lo dexó. Na so casa, el so padre yera madreñeru anque les faía, como munchos naquella dómina, para cubrir les necesidaes familiares, yá que solíen ser bien numberoses y asegura que de media en cada casa podíen precisar unos 10 pares. Foi’l so hermanu Manuel Martínez el que lo convirtió nun negociu y montó un taller y con él aprendió y trabayó mientres los sos entamos.
«Entós faíase tou a mano y trabayábase enforma, faíense unos seis o siete pares al día y podíen algamar los 2.000 pares al añu», recuerda’l madreñeru, que señala que nos entamos vendíen les madreñes ensin da-y los acabaos, yá que diben directamente a los almacenes onde les acababen y distribuyíen, pero eso reportába-yos unes ganancies bien xustes, cuidao que los pagaben unes 40 pesetes per par ensin acabar.
«Empecé de chaval a faer madreñes y vas-y coyendo’l gustu a la madera, porque cuando tienes un cachu de madera na mano y quies faer daqué y consiguir, xenera muncho prestu», confiesa Raúl Martínez, qu’esa afición por modelar la madera foi la que-y fixo siguir avanzando nel negociu y llegar a montar una fábrica mecanizá para poder allixerar la parte inicial del trabayu de convertir un cachu de madera n’una madreña ya incorporar a la cadena de producción los acabaos de les pieces para poder beneficiase del valor añedíu que suponía poner nel mercáu’l productu final. Entós podíen llegar a vendeles a 200 pesetes el par.
Nesos primeros años de puesta en marcha de la fábrica, recuerda que yeren 17 les qu’había en toa Asturies «y agora solo queda la nuesa, la razón ye que ye un trabayu que rique de munches hores y nun dexa enforma beneficiu, asina que los mozos yá nun lo aprendíen».
Raúl Martínez González y Raúl Martínez Rodríguez cola so madreñes acabaes. / D. Álvarez
La esceición foi’l so fíu, que, siendo entá adolescente, tuvo claro qu’el so futuru taría amestáu al pueblu, a la madera y al trabayu artesanal de fabricación de madreñes. «Entós yo vía que funcionaba’l negociu, había muncha xente nos pueblos inda, y tenía ganes de trabayar y dende pequeñu ayudaba no que podía y ver como una forma de vida», esplica Raúl Martínez Rodríguez, qu’asegura que, anque yá nun se vienden tantes madreñes como antes, puede llegar a fabricar un millar de pares al añu. Amás, asegura qu’inda’l 90 per cientu de la producción destinase a la vienta pal usu y solo un 10 per cientu acaba en decoración o adquiríu por turistes.
