- Alborecemos col cielu poco nuboso o escampláu, sicasí na fastera central asturiana tenemos borrín y dalgo de nublina con unes temperatures que tan alrodiu de los 14ºC, rexistrándose nel puirtu Payares 9,1ºC.
- Güei van dir dixebrándose los borrinos y nublines del alborecer pa dexanos el cielu poco nuboso o escampláu con unes temperatures que camudarán poco calteniéndose un ambiente suave y afayaizu anque na costa y zones espuestes l’aire nordés pue ser cafiante a partir del mediudía y baxar la sensación térmica.
- Mañana xueves sedrá’l día más calurosu de la selmana y de lo que llevamos d’añu col cielu totalmente escampláu y temperatures en bultable ascensu con másimes que superarán los 30ºC nel interior asturianu, sicasí nel llitoral l’ascensu sedrá muncho más comediu por mor de les brises costeres y la posibilidá de que surdar nublines d’advenció na primer llinea de costa.
- Durante’l riscar del vienres pasaremos muncho calor nel interior asturianu cola posibilidá de que tengamos una nueche tropical, esto quier decir que los termómetros nun baxarán de los 20ºC en ningún momentu. Pel día tendremos más nubes y descenderán dalgo les temperatures cola posibilidá de dalgún xarabatu tormentosu pela tarde.
- Paez que’l sábadu y domingu refrescará abondu ya tendremos nubosidá abondosa, sobre too’l domingu que pue vendir acompangada de precipitaciones pero esto yá lu diremos viendo.
