Empezamos la selmana cola irrupción d’una masa d’aire frío que se va dir enfusando n’Asturies a midida que meyora’l día. Los cielos van tar bien nublos con precipitaciones de calter débil pero xeneralizaes que, prácticamente, van tar presentes mientres tol llunes.
Estes precipitaciones van ser en forma de nieve cada vez en cotes más baxes. La cota de nieve va empezar sobro los 1800 o 1900 metros hasta’l mediudía. A media tarde yá va tar asitiada en redol a los 1500 o 1600 metros y, finamente, va nevar a partir de los 1200 metros a la fin del día.
Les temperatures, evidentemente, van baxar en tol Principáu. Tantu les mínimes como les máximes van ser más baxes que les del domingu. Los vientos van tar afitaos de norte-nordeste con raches moderaes preferentemente na mariña.
El martes vamos siguir cola masa d’aire frío afectándonos de forma que nun se refuga nieve a partir de los 1000 o 1100 metros mientres les primeres hores de la mañana anque va xubir a lo llargo del día. La xornada volverá tar marcada tamién peles nubes y poles precipitaciones que, a priori, van ser más débiles y menos frecuentes que les del llunes. Ello ye que esta inestabilidá va tender a unviar a la fin pudiendo inclusive abrise claros. Los vientos van soplar de nordeste y, a última hora, rolarán a componente este.
