El pasáu 29 de mayu el plenu del Ayuntamientu de Tinéu -con mayoría absoluta de PP y Vox– aprobó nos sos presupuestos zarrar la Escuela Municipal de Música, desaniciándose’l serviciu públicu existente. Como rechazu a esta decisión, l’Asociación de Madres y Padres de la Escuela Municipal de Música de Tinéu entama una concentración contra esta decisión que cuntó cola oposición de los demás grupos políticos, amás d’una montonera persones venceyaes a la cultura. La movilización va ser el sábadu 14 de xunu a les 17h ente la Plaza Alonso Martínez, Cai Mayor y Plaza del Ayuntamientu de la capital del conceyu.
