Los talleres d’oficios tradicionales, les races autóctones y el bateo d’oru protagonicen una xornada d’homenaxe llabrador na feria de L’Ascensión.
Per unos díes, la vaca de bronce qu’esculpió l’artista Manolo Llinares nun ye la única del Campu San Francisco. Acompáñen-y otres vaques, asturcones y cabres bermeyes axuntaos na amuesa de races autóctones de la feria de L’Ascensión. A escasos metros, na fiesta declarada d’interés turísticu rexonal, arrexuntase amueses d’oficios, artículos d’artesanía y variaes actividaes infantiles. El campu viaxa al Campu San Francisco nel homenaxe qu’Uviéu-y tributa tolos años y que esti sábadu vivió la so segunda xornada.
Aprender a modelar pieces de cerámica o a tallar madera y afondar na técnica del bateo d’oru forma parte de la programación, que s’estiende mientres tola xornada del domingu. L’Asociación de bateadores «Barciaecus» realizó, nel Paséu del Angelín, exhibiciones y talleres, pela mañana, «para convertise nun buscador d’oru» para entamar, yá pela tarde, el primer Campeonatu de bateo d’oru Feria de l’Ascensión. Un tornéu que supon «el precalentamiento para’l Campeonatu Mundial que va acoyer Navelgas del 3 al 9 d’agostu», asegura César Castañu, presidente del colectivu.
