Esperamos cielos bien nublos pela mañana salvu nel suroccidente y cordal onde les escamplaes van tener mayor protagonismu. Mientres les primeres hores de la tarde esta nubosidad de tipu baxu va dir sumiendo, pero de la mesma va dir aumentando la nubosidad d’evolución diurna (nubes medies y altes) dende’l cordal que se se van estender escontra’l restu del Principáu. Tocantes a les precipitaciones, pela mañana nun se refuga dalgún orbayu bien poco importante principalmente na mariña, y mientres tardar-nueche podríen dase bastios d’orixe tormentosu que, a priori, va afectar con más probabilidá a la metá oriental asturiana.
Comoquier, l’Axencia Estatal de Meteoroloxía va activar a partir del mediudía l’avisu mariellu tanto nel cordal, como nel suroccidente y el sector central, por bastios que podríen rexistrar hasta 15 llitros per metro cuadráu nuna hora, amás de venir acompañaos de nube y de xarazo. Les temperatures van xubir tanto les máximes como les mínimes. Los vientos van ser fluexos predominando de nordeste na mariña onde, mientres la segunda metá del día, podríen soplar con intensidá moderada.
El martes va ser un día con nubes medies y altes, con bastios tormentosos (avisu mariellu en tola rexón a partir de les 15:00 hores), pero tamién con calor. Les temperatures van xubir de forma notable y podríen superase los 30 ºC n’Asturies.
