- Alborecemos col cielu poco nuboso o escampláu, sicasí na fastera central tenemos nubosidá estratificada con unes temperatures que tan alrodiu de los 17ºC, rexistrándose nel puirtu Payares 14,9ºC.
- Güei tovía tendremos un día sanu, una vegada que se dixebren los estratos del alborecer quedará’l cielu escampláu o poco nuboso con unes temperatures que subirán dalgo pero soportables con másimes ente los 25-30ºC, dalgo menos na costa por mor de les brises marines.
- Mañana miércoles les temperatures másimes yá algamarán los 30ºC prauticamente en tol interior asturianu, dalgo menos na costa que tovía esfrutarán d’un ambiente más afayaizu. El cielu va tar escampláu o poco nuboso con nubes de desendolque a patir de la tarde que puen dexar dalgún xarabatín de calter tormentosu de manera ocasional ya dispersa.
- El xueves ya vienres paez que podemos tener calor estremu con unes temperatures másimes que puen sobrepasar los 35ºC en gran parte del interior asturianu y los 30ºC pela costa, amás el cielu va tar empuercáu de nubes altes que pela tarde puen desendolcase y dexanos dalgún xarabatu de calter tormentosu, dispersu ya ocasional, nun sedrá hasta’l sábadu cuando entamen a baxar dalgo les temperatures cuando tendremos dalgo más de nubosidá y dalguna tronada pela tarde pero esto yá lu diremos viendo.
