Rodri Joglar fálanos d’un discu clave na hestoria de la música de raigañu

La década de los años 80 n’Asturies supón pa la música asturiana, y n’especial pa la música tradicional, una auténtica esplosión de proyeutos de gran importancia nes décades siguientes.

Toa una xeneración de moces y mozos vuelven los güeyos a esa Asturies tapecida polos dogmes culturales afitaos pola dictadura qu’apocayá finara. Colos nuevos aires democráticos aporta, ente otres munches coses, un procuru por conocer la cultura y la llingua propies, nuna búsqueda d’una identidá que permita a Asturies algamar una nueva forma de ser y de tar nel mundu.

En mediu d’esti fervideru cultural, empobináu ente otres cuestiones pola incorporación d’Asturies a les llamaes Naciones Celtes del Arcu Atlánticu al traviés de la participación nel Festival Intercélticu de Lorient, la gaita asturiana afitase como ún de los elementos musicales señeros de la dómina. Apaecen bayura d’intérpretes mozos que faen de ponte ente los gaiteros clásicos y les músiques urbanes, puxando por caltener y esparder la tradición amestando elementos contemporáneos, tantu na enseñanza como na producción musical.

Ún d’estos mozos foi Xuacu Amieva (1954), anguaño ún de los nomes fundamentales pa entender la recuperación de la música tradicional asturiana. En 1986 venía d’algamar el prestixosu Troféu Macallan de gaita asturiana y gallega nel Festival Intercélticu de Lorient y “Onde l’agua ñaz” supón la so puesta de llargu nel tarrén discográficu.

Esti trabayu, xunto a los discos de Manolo Quirós, que yá venía esperimentando n’incluyir la gaita n’otros contestos sonoros, supón un pasu más allá, una evolución progresiva y natural dende la música de pareya de gaita y tambor hacia una música folk, con instrumentación más variada, como l’arpa, guitarres, teclaos, acordión y delles percusiones tradicionales asturianes.

“Onde l’agua ñaz” ye amás l’estrenu d’un modelu de gaita en do, construyíu por Alberto Fernández Velasco, que favorecía l’empaste con otros instrumentos melódicos al estandarizar el diapasón y la escala del punteru, dando los primeros pasos p’averar la gaita a una escala con temperamentu igual. Esta gaita emplegóse en grupos como “Ubiña”, proyeutu fundáu en 1985 y que grabaría’l so únicu discu en 1988.

En “Onde l’agua ñaz” collaboren dellos de los componentes d’Ubiña, como José Manuel López (curdión), Rody Herrera (guitarra) o Michael Lee Wolfe (mandolina). Completen les collaboraciones José Manuel Collado a la voz, nuna maxistral interpretación de l’asturianada “Soi de Pravia”; Ana Mª Monteserín, María Jesús Arminio, Marta González y Yolanda Cortina, del grupu Los L.lumerinos, a los panderos, castañueles y voces; Nuria Pelegrín y Ana Pilar Álvarez a les castañueles; Fernando Largo al arpa y los teclaos y Daniel Lombas al bodhrán.

Esti trabayu ta editáu pola Sociedad Fonográfica Asturiana, ta producíu por Lisardo Lombardía y grabáu nos estudios “Eolo” de Xixón, del ya fináu Pedro Bastarrica.

El repertoriu de gaita nel discu

El discu presenta doce cortes, once d’ellos tradicionales asturianos y l’últimu un amiestu de dos pieces, la polka “The bear dance” (asturianizada darréu como la “Danza l’osu”) y la xiga escocesa “Lieutenent McGuire”. Esti últimu amiestu fadráse perpopular na cultura gaitera d’Asturies de magar esos años. La Danza l’osu aportó a Asturies nel añu 1984, cuando’l grupu cornuallés Ragamuffin tocó nes fiestes de San Matéu n’Uviéu, onde compartieron escenariu col grupu Beleño. Dani G. de la Cuesta, que fora vigulineru nesta agrupación, coméntanos que l’amistá surdía esa nueche dió aniciu a la popularización del tema n’Asturies.

Tocántenes al restu del repertoriu, recueye una bona amuesa de música de gaita tradicional, con títulos qu’habríen convertise en clásicos del repertoriu de los gaiteros y agrupaciones posteriores, como alboraes (Alborada asturiana y Alborada de Maquilo, esta última col acompañamientu al arpa del desapaecíu Fernando Largo), marches procesionales como la de Balmonte de Miranda y otros repertorios d’usu relixosu, como l’Entroito, melodía interpretada al entamu de la misa por gaiteros como Juan de La Torre, de Teberga, amás de pieces pal baille y asturianaes. El compañeru Luis Pola nos apunta, referíu a esti últimu tema, qu’a pesar del títulu, nun se correspondería melódicamente col Entroito, d’orixe gregorianu, sinon qu’esplicaríase como un usu por parte de los gaiteros d’otres melodíes diferentes, enxertaes nesi momentu concretu de la misa y quedando la denominación de manera testimonial. Esti fenómenu dase en gaiteros de diferentes partes d’Asturies.

Bona parte del repertoriu del discu espeya la tradición musical del conceyu de Cangas del Narcea, ún de los más estudiaos nos trabayos de recoyida dende los años 70 y onde Xuacu punxo escuela de gaita. Bona amuesa d’ello son títulos como “Marcha Vaqueira” o “Alborada de Maquilo”, versiones del repertoriu de los míticos “Son de Arriba”, bandina imprescindible pa entender la gaita nel conceyu; o un amiestu de sones d’arriba acompañáu poles pandereteres del grupu “Los L.lumerinos” de L.lumés.

Rescampla tamién la segunda pista del discu, “Rabelada: el valse/la escosa”, con repertoriu de bandurria asturiana, instrumentu de cuerda frotada inxustamente escaecíu, del que Xuacu ye ún de los pocos intérpretes d’anguaño.

Completen el discu la versión de la Muñeira de Batribán, adaptada del repertoriu del gaiteru Fermín Díaz Prieto, conocíu como “Firme de Batribán”, del conceyu de Vilanova d’Ozcos; el Pericote, danza icónica del conceyu de Llanes y el Careao, baille vaqueiru nuna interesante versión d’Andrés Fernández, mayestru gaiteru y constructor de gaites del Centru Asturianu de México.

Ensin dulda dalguna, “Onde l’agua ñaz” marca un antes y un después na música de gaita asturiana, afitando pieces icóniques del repertoriu actual, un xeitu característicu d’entender la reellaboración de la música de gaita y una de les bases pal constructu del llamáu “estilu tradicional” na interpretación del instrumentu, arriendes d’una propuesta actual col envís d’averar la música tradicional a otros públicos.

Gracies a Xuacu Amieva, Alberto Fdez. Varillas, Dani Gª de la Cuesta, Fonsu Fernández, Luis Pola y Juanjo Prado pola ayuda nes consultes d’información feches pa la realización d’esti artículu.

Rodrigo Fernández Joglar