Dende Cultura/ Xixón tán acabante d’anunciar los primeros nomes que van tocar, ente los que s’alcuentra José M. Tejedor pela parte asturiana.
Del martes 29 de xunetu al domingu 3 d’agostu Xixón va acoyer la X edición del Festival Arcu Atlánticu, eventu dedicáu a les músiques de raigañu -tanto tradicionales como contemporánees- de les distintes identidaes culturales que formen la rexón atlántica. Dende la FMCEyUP del Conceyu avancen que «lo más de la so programación va tener llugar na cai, dando espaciu a la música, el teatru, la danza, les artes plástiques y audiovisuales, la gastronomía o’l cine«.
El primer nome asturianu confirmáu ye’l de José Manuel Tejedor, pernomáu gaiteru que va facer un repasu pel so repertoriu acompañáu de dellos músicos y collacios de la música’l país. La so actuación va ser el miércoles 30 a les 19.30h nel Muséu del Pueblu d’Asturies. Ente les confirmaciones foriates tán les gallegues Fillas de Cassandra (martes 29, 22h, Plaza Mayor), los vascos DAB Dantza Konpainia (martes 29, 20h, Plaza’l Marqués y La Glo (vienres 1 d’agostu, 23h, Torre del Reló) y los bretones Skolvan (miércoles 30, 22h, Centru de Cultura Antiguu Institutu).
Tamién anunció la organización del eventu les ubicaciones qu’esti añu van ser al aire llibre na Plaza Mayor, Plaza del Marqués, Campu Valdés, Torre del Reló, Plaza Arturo Arias, Plaza de Xovellanos, Xardinos de la Reina y n’espacios zarraos nel Centru de Cultura Antiguu Institutu, Antigua Escuela de Comercio, Muséu del Pueblu d’Asturies y Colexata de San Xuan Bautista. Nos díes vinientes l’Ayuntamientu de Xixón va dir dando más novedaes d’esti festival qu’entamó de siguío ente 2012 y 2019 y que volvió a recuperar l’añu pasáu.
