- ➡️Son 40 places, que van recibir formación mientres 30 hores.
- Depués van formar a otru personal docente coles mires de prevenir actitúes discriminatories y la violencia de xéneru nes aules.
- Arrinca la primer ‘Escuela de Formadores en Coeducación’.
- Los espertos en coeducación inciden na so importancia para una sociedá igualitaria. VIDEU
La conseyera de Presidencia, Retu Demográficu, Igualdá y Turismu, Gimena Llamedo, destacó esti llunes el compromisu del Gobiernu d’Asturies cola prevención de la violencia de xéneru mientres la inauguración de la primer ‘Escuela de Formadores en Coeducación’, que representa «la única vacuna» esistente para la prevención d’esta violencia.
Mientres la inauguración, la conseyera sorrayó que la escuela ye «un pasu más» para siguir avanzando escontra la igualdá y celebró que les 40 places del cursu completárense «en cuestión d’hores» y que se recibieren barganal de 200 solicitúes.
Esto demuestra, según afirmó Llamedo, que’l personal docente «quier siguir formándose» y qu’Asturies avanza escontra una sociedá «más igualitaria y llibre de violencia de xéneru».
La escuela ye un taller de 30 hores para persones que depués van formar a otros docentes coles mires de prevenir actitúes discriminatories y la violencia de xéneru nes aules.
Los espertos en coeducación inciden na so importancia para una sociedá igualitaria
Coeducar ye educar n’igualdá por que toos y toes tengan les mesmes oportunidaes, por qu’haya más neñes inxenieres, por casu, y más padres corresponsables na crianza. Inda esisten desigualdaes y por eso ye importante esta coeducación, que se debe impartir correchamente, y por eso esti cursu.
Laura Viñuela, esperta en coeducación, señaló n’una entrevista en TPA Noticies Mañanera que s’avanzó enforma nos últimos años pera la sociedá, n’ocasiones, sufre regresiones.
