El FIG presenta esti sábadu’l programa de la so XVIII edición y entama una clase maxistral de caxa. L’Atenéu Obreru de Villaviciosa acueye esta cita na que la organización va anunciar toles actividaes dempués del taller del canadiense Ian Morris
Del 4 al 7 de setiembre Villaviciosa va acoyer otru añu más el Festival Internacional de la Gaita (FIG), que nesta ocasión llega a la so edición númberu dieciocho. Esti sábadu 19 de xunetu la Banda Gaites Villaviciosa – El Gaitero -organizadora del eventu- va presentar la programación completa del eventu y, enantes, va entamar un taller de caxa d’alta tensión que va dar el percusionista canadiense Ian Morris.
La XVIII edición va tar formada por conciertos, charres, talleres, dos Nueches Folk, mercáu d’artesanía, esposiciones, alcuentru de bandes de gaites, amuesa d’artesanos d’instrumentos musicales tradicionales, la decimocuarta edición del concursu de gaiteros Memorial José Huerta, la IX Nueche en Danza del FIG y otres sorpreses que va presentar la organización esti sábadu a les 18h nel Atenéu Obreru de Villaviciosa.
Pa completar la xornada, dende’l FIG entamen a les 16h una clase maxistral d’Ian Morris, músicu profesional canadiense qu’anguaño reside en Xixón. Tien formación académica n’interpretación de percusión, vien de desolcar el cargu de Director de Percusión de la Policia Real d’Omán, tien una bayurosa carrera dientro de bandes de gaites -ente les que destaca la Shotts and Dykehead Caledonia Pipe Band-, y algamó dellos premios en campeonatos rellacionaos con estes agrupaciones. El taller de caxa d’alta tensión que va dar ta empobináu al mundu de la percusión pa banda de gaites y yá ta abierta la inscripción por un preciu de 25 € a traviés del corréu festivalinternacionaldelagaita@gmail.com.
Un festival referente
El Festival Internacional de la Gaita de Villaviciosa ye una de les cites imprescindibles de la escena folk y tradicional y tien la particularidá de tar dedicáu a la difusión de les gaites del mundu y les sos respectives músiques y cultures asociaes. L’eventu cunta col sofitu del Ayuntamientu de Villaviciosa y del grupu El Gaitero, amás de la hostelería y del comerciu del conceyu y otres empreses y voluntarios y voluntaries. Tou esti trabayu colectivu da como resultáu un eventu qu’a lo llargo de cuatro díes axunta a miles de persones na capital maliaya.
