- Fonte: Fusión Asturies /
Corralada de los bisontes nel Parque de la Prehistoria de Teberga.
El Centru d’Arte Rupestre de Tito Bustillo y el Parque de la Prehistoria de Teberga preparen un calendariu de branu apináu de talleres infantiles y actividaes pa tola familia colos qu’enfusase nel Paleolíticu.
El públicu infantil de 4 a 11 años va poder recrear nel Centru Tito Bustillo lo qu’esperimentaron los nuesos antepasaos gracies al taller Manos al pincel y a pintar el panel. Mientres xunetu y agostu, de miércoles a domingu, o les fines de selmana de setiembre van conocer les técniques pictóriques d’antaño al empar que van pasar un ratu de lo más risonderu.
Los más nuevos tamién van poder participar d’otres opciones acompañaos de los sos familiares, yá que hai delles actividaes programaes pa ello según el mes. En xunetu, nel taller Conociendo a les Venus los participantes van esfrutar faciendo pequenes estauínes con unes de les formes más frecuentes de la representación de la muyer na Prehistoria. Esta actividá, ideal pa un públicu familiar con menores a partir de 4 años tien llugar los miércoles, xueves, vienres y domingos del mes a les 16:00 hores.
P’aprender cómo los nuesos antepasaos pescaben salmones nel Sella, Tito Bustillo ufierta’l taller A por salmones con arpones, que ta inspiráu nes pieces espuestes nel Centru d’Arte Rupestre. Esta actividá va tener llugar nel mes d’agostu, de miércoles a vienres y los domingos (sacante’l día 10).
Otru de los talleres d’ésitu ente los más pequenos ye’l d’Animales con muncho fríu que tien llugar les fines de selmana de setiembre. D’una manera entretenida, van conocer los animales qu’esistieron na Prehistoria: mamuts, osos avernarios, tigres dientes de sable… Como toos ellos teníen una pelame col que se protexíen del fríu, nesta actividá van recrear esa pelame con distintos materiales.
P’aprender cómo los nuesos antepasaos pescaben salmones nel Sella, Bustillo ufierta’l taller “A por salmones con arpones”, que ta inspiráu nes pieces espuestes nel Centru d’Arte Rupestre.
El públicu familiar tamién puede participar nel taller de dibuxu Fotografiar cola mirada, qu’amuesa la complexidá del trabayu de los artistes prehistóricos que pintaron les cueves los sábados de xunetu y agostu (sacante’l 9 y 30 d’agostu). Esta actividá completa la visita a la esposición Del esterior al interior. La mirada del artista paleolíticu, abierta hasta’l 24 d’agostu, con barganal de 50 fotografíes del arqueólogu y fotógrafu Alberto Martínez-Villa con delles de les representaciones d’animales más interesantes nes cueves con arte rupestre, en contraposición con imaxes actuales d’estos animales na naturaleza. El mesmu Martínez-Villa va emponer xuna visita a esta amuesa temporal el 11 de xunetu, a les 16 hores.
Bustillo acueye amás la décima edición de l’Amuesa Artística Riosellana del colectivu Somos, que del 19 de xunetu al 24 d’agostu va amosar el trabayu de diez artistes con una gran variedá de técniques, como’l colax, oliu, pintura dixital o la fotografía, o xugando cola poesía o la narrativa.
Visites a la corralada d’animales o taller de caza prehistórica nel Parque
El Parque de la Prehistoria de Teberga propón paseos empuestos poles corralaes pa ver a los animales que yá pintaben los nuesos antepasaos (martes y xueves de xunetu/ agostio y los domingos de setiembre). Nestes visites empuestes pela zona esterior del Parque pueden conocese cómo son los caballos tarpanes y Przewalski, d’orixe prehistóricu, según a los uros, consideraos l’antepasáu selvaxe de toles vaques del mundu. Tamién los exemplares de gamu, venaos y bisontes europeos. Na actividá va conocese en qué consiste la so alimentación y otros intereses, como los cambeos de pelame según la estación.
Visitantes al Parque de la Prehistoria de Teberga frente a un caballu Przewalski. El públicu familiar tamién puede afayar cómo yeren les técniques de caza na Prehistoria y poner a prueba la so maña con delles de les armes paleolítiques como’l propulsor o l’azagaya na actividá que se realiza los llunes, miércoles, vienres, sábados y domingos de xunetu y agostu y los sábados de setiembre.
Amás, puede visitase la Galería, l’espaciu museísticu del Parque, y participar nos percorríos empuestos pola Cueva de Cueves, un espaciu que dexa acolumbrar la maxa de les pintures nel marcu natural, yá que cunta con reproducciones a escala real de trés significativos conxuntos del arte rupestre paleolíticu européu: la Sala de los Polícromos de la Cueva de Tito Bustillo, el panel nº4 del Salón Negru de la cueva de Niaux (Francia) y la d’El Camarín de la Cueva de Candamo, n’Asturies, na qu’apaecen les figures de dellos équidos y un uro, animal escastáu nel s.XVII.
El Parque de la Prehistoria de Teberga y el Centru d’Arte Rupestre tán xestionaos pola Sociedá Pública de Xestión y Promoción Turística y Cultural del Principáu d’Asturies, dependiente de la Conseyería de Cultura, Política Llingüística y Deporte.
- Más información sobro horarios, tarifes y actividaes: Parque de la Prehistoria – Centro Tito Bustillo
