- Circular 2025-26 centros PÚBLICOS (pdf)/ Anexos Centros públicos (pdf)/ Actualidá
- Páx. 35 Proyectu educativu n’asturianu LLUME y Xira Didáutica
- Oxetivu nº8. Llingües Propies: Fomentar la conocencia y usu del asturianu y l’eonaviego como parte del patrimoniu cultural d’Asturies, promoviendo la so presencia en toles etapes educatives.
La Conseyería d’Educación unvió a los centros educativos la circular d’entamu del cursu 2025-2026, que pon en marcha dende setiembre’l pactu Asturies Educa, con midíes concretes como’l refuerzu de profesoráu d’atención a la diversidá y auxiliares educadores o meyores en dixitalización. Tamién introduz novedaes relevantes, como la ellaboración del decretu contra l’acoso escolar o’l documentu marco para facilitar la transición ente etapes educatives.
4.4.8. Proyectu educativu n’asturianu “LLUME”. Supon una reconocencia a los centros con exemplos de práctiques d’excelencia educativa, programes de dinamización, exemplos de innovación educativa na área o materia de Llingua Asturiana o en proyectos llingüísticos o ámbitos que les incluyan nos sos oxetivos d’aprendizaxe.
La participación de los centros va consistir na presentación d’un proyectu realizáu por el mesmu centru: actividaes, participación en proyectos interdisciplinares o cualesquier otra iniciativa, nos que se trabaye l’asturianu o’l eonaviego en cualesquier de les etapes educatives, acordies con la convocatoria referida en réxime de concurrencia competitiva para’l cursu 2025-2026.
Los criterios para’l llogru del proyectu educativu n’asturianu “Llume” van basase en trés exes que van tener en cuenta’l porcentaxe y l’enclín na matrícula na materia o área; la singularidá, orixinalidá, excelencia del proyectu o actividá realizada que se presente para la so valoración y nel formatu y conteníos propios del propiu proyectu presentáu.
La reconocencia del proyectu “Llume” va realizase al traviés d’un actu públicu que va traer l’allugamientu d’una placa identificativa nel centru y un premiu de calter económicu para’l desenvolvimientu de nueves propuestes para la innovación, la excelencia y la dinamización de la llingua asturiana o eonaviega na so comunidá educativa.
4.4.9. Xira didáctica La Xira didáctica ye un proyectu de dinamización cultural y educativa pensada para l’alumnáu de Llingua Asturiana y Lliteratura y de Gallego-asturianu/Eonaviego y pon a disposición de los centros educativos asturianos una selección d’actividaes culturales y educatives creaes pola industria cultural asturiana nes que la llingua vehicular ye l’asturianu o’l eonaviego.
El catálogu d’actividaes que se van ufiertar na *Xira didáctica 2025-2026 va incorporar propuestes de dellos tipos con valor educativu: musicales, artístiques, creatives, teatrales, lliteraries o otres prensaes para los centros d’enseñanza y para les etapes d’Educación Infantil, Educación Primaria, Educación Secundaria y Bachilleratu afeches a cada nivel y etapa.
La Xira didáctica presentarase nun catálogu zarráu de propuestes culturales programaes en feches y llugares específicos de toa Asturies en ficies de que tola comunidá educativa tenga accesu a ella. La ufierta d’actividaes va faese pública al traviés de los medios institucionales habituales: Portal educativu Educastur y @http://asturiesculturaenrede.es/
Cada centru, con alumnáu matriculáu n’asturianu o gallego-asturianu/eonaviego tendrá de valorar qué actividaes selecciona, siguiendo les instrucciones de la convocatoria.
La comunicación caltien la estructura, con dos talos documentos pa la rede pública y l’alcordada, pero reordena l’índiz p’afaelo a la Programación Xeneral Añal (PGA) que tien d’ellaborar cada centru. Amás, allixera’l cuerpu xeneral del documentu con dellos anexos, como’l calendariu d’actuaciones institucionales, el calendariu escolar, les condiciones pa los centros usuarios de programes dixitales, la xestión económica o’l Fondu Social Européu.
L’atención a la diversidá -uno de los principales epígrafes del mentáu pactu- materializase cola medría, a partir d’abril de 2026, de 120 places de profesoráu de Pedagoxía Terapéutica (PT) y d’Audición y Llinguaxe (AL). Y, en casu de disponibilidá presupuestaria, va adelantarase a febreru del próximu añu.
Coles mesmes, la contratación d’auxiliares educadores pretende garantizar la equidá del sistema, atendiendo al alumnáu con necesidaes educatives especiales, por que pueda recibir una formación con garantíes. L’actuación va tar financiada pol Fondu Social Européu Plus (FSE+) 2021-2027. El documentu, acabante roblar coles principales organizaciones sindicales, contempla la incorporación de diez auxiliares pal próximu cursu.
La circular inclúi novedaes en dixitalización que tamién formen parte del pactu, nel apartáu de desburocratización, tanto pa la xestión alministrativa como pa la prestación de servicios electrónicos a la comunidá educativa. Les families, el profesoráu y los equipos directivos van poder aportar cada unu a la so área al traviés d’un mesmu interfaz web.
Ente los servicios disponibles pal profesoráu, figuren la firma dixital del personal interino, la xestión del carné docente y de les faltes d’asistencia del alumnáu, l’accesu al llistáu de cursos de formación, la unviada de comunicaos a les families, la consulta de calificaciones y convocatories del procedimientu selectivu. La nueva área d’equipos directivos va dexar realizar l’almisión nes escueles de 0 a 3 años. El restu de les funciones va siguir dientro del programa Sauce, al que podrá aportase dende la mesma web.
Tamién tán recoyíes, tanto na circular como nel pactu, midíes de sofitu a les direcciones unipersonales de centros, que son aquelles nes qu’exerz un docente en solitariu.
Per otru llau, el testu inclúi’l nuevu decretu pa regular la prevención, detección y erradicación del acoso escolar, que yá ta en fase d’ellaboración. El documentu va contemplar un plan cuatrienal con actuaciones concretes y va regular los conteníos, la redacción y la vixencia de los protocolos esistentes. Tamién se va crear un observatoriu.
Al envís de encetar esti problema, tolos centros tendrán de cuntar con un plan de prevención del acoso escolar. La conseyería va poner a la so disposición el programa Tutoría ente Iguales (TEI), adquiríu pol Gobiernu d’Asturies pal segundu ciclu d’Infantil, Primaria y Secundaria.
Otra aportación consiste na ellaboración d’un documentu marco de transición ente etapes educatives, con orientaciones y procedimientos comunes pa facilitar esos cambeos. L’oxetivu ye promover una coordinación efectiva ente los centros, la participación de les families y l’acompañamientu emocional y pedagóxico del alumnáu, cuantimás, d’aquel que precise de sofitu educativu específicu.
En materia d’inclusión, la circular inclúi’l programa Patios dinámicos, pa impulsar nos centros una actividá lúdica d’acompañamientu al alumnáu y qu’esanicie posibles barreres pal aprendizaxe. La finalidá ye tresformar el recréu nun espaciu inclusivo y educativo. Pa ello, va ufiertase formación a los centros pa enllantar el programa de forma progresiva.
Amás, da continuidá a les estratexes, pioneres n’España, de detección d’alumnáu d’altes capacidaes y con trestornu del espectru autista. Igualmente, preve una ampliación del programa d’aules abiertes a 30 centros educativos.
Otra midida ye l’ampliación de la collaboración col Colexu Oficial de Psicoloxía, que va impartir charres formatives contra’l suicidiu a equipos directivos del tercer ciclu de Primaria y va dar continuidá a la so intervención col restu d’etapes.
La circular incorpora, coles mesmes, el resolvimientu sobro l’usu de dispositivos dixitales como recursos complementarios nel procesu d’aprendizaxe y reflexa los programes, yá empecipiaos, de refuerzu de les competencies matemática y llectora. Amás, califica como puestos de mal desempeñu les direcciones de les escueles de 0 a 3 años.
