- LNE / galería semeyes /
El peculiar certame remata la so quinta edición con una nueva y sorprendente amuesa colectiva pintada sobro silos de paya. Un nuevu percorríu d’arte en boles en Porrúa (Lanes).
Un raposu y un raitán dan la bienvenida a Porrúa, nel conceyu de Llanes. Son los vixías pintaos sobro los dos primeres boles de silu que decoren esta localidá llanisca, arrodiaos de naturaleza y perfectamente integraos nel espaciu, anque surdíos de la imaxinación. Esta ye solo una de les munches creaciones que dexa la quinta edición del festival «Porrúa en Boles», que remató esti domingu cola participación d’una quincena d’artistes. Anque yá colgaron los sos pinceles, les sos obres van permanecer mientres tol añu en Porrúa tresformando’l paisaxe nuna auténtica galería al campu.
Ente les munches representaciones destaca la d’Helena Toraño, de Po, primer nel percorríu artísticu. Cunta que pa llevala a cabu inspirose na esuberancia y guapura del redolada que la arrodia: «Ye una naturaleza bien verde, con muncha vexetación y frondosa, y los animalinos qu’apaecen dan-y un toque como de cuentu y de fábula».
La ruta avanza dende esti puntu, daqué alloñáu de la mesma entrada del pueblu, y sigue inclusive más allá d’él. El visitante, yá sía en coche o caminando, puede dir afayando caúna de les manifestaciones artístiques que, cada añu, destaquen pola so orixinalidá y singularidá. A lo llargo del trayectu, asocédense obres de too tipu, caúna col sellu y la sensibilidá del so autor.
Propuestes íntimes y personales que remembren el mar, a lo rural y a la familia. Carlota González de la Rosa apostó por un símbolu fondamente asturianu, la madreña, acompañada d’una frase que refuerza’l so mensaxe. Pela so parte, Celia Pandiella rindió homenaxe al mundu rural con una obra dedicada a les sos «güelos» Luisa y Tinu, de La Redondina, en Llaviana.
Ainoa Riesco, artista visual, quixo faer una alusión a la memoria, el folclore y l’amiestu de cultures. La so obra representa fueyes del «aguacatón» de Porrúa, ente les qu’apaecen símbolos que, según señala, «representen misterios y mieos comunes a tolos seres humanos».
Tamién hai obres más oníriques, como la de Chylo, artista d’orixe polacu afincáu en Xixón: «Aproveché un pocu la forma de la bola como xuna superficie tan peculiar y crear d’ellos unos seres imaxinarios ya independientes abondo llibres por que cada unu pueda interpretalo a la so manera», declaró.
Dende una estética más naíf, la ilustradora y editoria Verónica Grech compunxo’l so diseñu con elementos coloríos y accesibles: manos saludando, cascoxos, dos ciempiés que se dan un besu, flores o un perru, n’alusión a la perrera cercana: «La idea yera faer daqué que pudiera gusta-y a tol mundu, especialmente a los neños, que son unos espectadores que dacuando se nos escaecen», esplicó. Ello ye que el so fíu Oliver ayudola a pintar.
Ente les propuestes más reivindicatives atópase la de Laura na que puede lleese «Salvemos Peñamayor» en sofitu y visibilidá a esta plataforma vecinal que busca detener el permisu d’investigación minera Ástur A na Sierra y protexer la so redolada.
Tamién la de Paula Reciu, conocida como Luka the Pau, que realizó delles composiciones: una n’honor a Palestina como crítica al xenocidiu, otra en defensa de la neurodiverxencia y xuna más que denuncia la sexualización de los pechos y rinde homenaxe a les muyeres que sufrieron cáncer de mama.
Porrúa en Boles ye una esperiencia inclusiva, intergeneracional y comuñal, qu’abraza tantu a artistes como a vecinos, visitantes, mayores y neños. Trátase d’un festival que conxuga arte y redolada rural con naturalidá y muncha frescura. Bastante ye que, tamién s’espunxeron creaciones ellaboraes polos mesmos habitantes del conceyu.
Una iniciativa vanguardista y pionera que sigue afarando ente’l públicu y que nesta quinta edición llogró profesionalizase. Toos faen un balance bien positivu y animen a que siga teniendo continuidá: «Ta xenial poder sacar de les ciudaes l’arte y la cultura a la zona rural», resumió Enrique Díaz.
