España apodera’l surf européu y parte d’esi ésitu tien acentu asturianu gracies a una entrenadora, Yumey González, responsable del longboard na Selección Española, modalidá que contribuyó al títulu absolutu con un oru del xixonés Nicolás García y una plata de Julieta Rodríguez-Villamil. Tres España, completaron el podiu del EuroSurf 2025 apostáu en Santa Cruz la selección anfitriona, Portugal, siguida d’Irlanda.
La representación española robló una actuación brillosa nesti campeonatu con un papel destacáu en toles categoríes, tantu en surf de tabla curtia como nel longboard. Tolos deportistes españoles que participaron na prueba –Luis Díaz, Rubén Vitoria, Dylan Donegan, Ariane Ochoa, Lucía Machado, Sol Borelli, Nicolás García y Julieta Rodríguez-Villamil– contribuyeron a esti ésitu apináu con una medaya d’oru na puntuación final.
Quepe destacar n’ese llogro la modalidá de longboard, de la que ye responsable técnica l’avilesina Yumey González. La entrenadora, de 33 años, formaba parte d’un cuerpu técnicu de cinco persones –al pie de Ricardo Bilbao, Luis Pérez, José Ruiz y Luis Morales– y pudo cimblar como’l restu de la delegación nacional col títulu inéditu para’l nuesu país de campeón d’Europa de longboard masculín d’otru asturianu, el xixonés Nicolás García.
«Nicolás demostró un peraltu nivel técnicu, combinando elegancia, control y fluidez en cada fola»
«Con una actuación sobresaliente na gran final, Nico demostró un peraltu nivel técnicu, combinando elegancia, control y fluidez en cada fola. La so estratexa y llectura de la mar fueron claves para imponese n’una manga bien reñida, onde supo caltener l’aselu y executar el so meyor surfing nel momentu decisivu», destaca la mesma Federación Española de Surfing.
Pero Yumey González non yá puede presumir d’esi ésitu, porque otra pupila so, Julieta Rodríguez-Villamil, llograba tamién un brillante subcampeonato d’Europa na categoría de longboard femenín nel Eurosurf 2025, roblando una de les sos meyores actuaciones internacionales col equipu nacional.
En cuanto al restu d’actuaciones individuales nesta prueba de calter internacional n’agües portugueses, Ariane Ochoa proclamábase subcampeona d’Europa en surf femenín y Luis Díaz remataba la so participación con un tercer puestu d’Europa en surf masculín.
Esti títulu européu representa una importante reconocencia para’l longboard español. El so trunfu sumise al bon papel protagonizáu pola Selección Española en Santa Cruz,«dientro d’un proyectu deportivu que combina esperiencia y talentu nuevo», como se destaca dende l’organismu federativu sobro un ésitu qu’en delles modalidaes nun tien precedentes nesti deporte a nivel nacional.
Yumey González Rodríguez ye profesora d’Educación Física, actividá que desenvolvió nel últimu añu na Escuela del Deporte d’Asturies con see n’Avilés y nel Institutu d’Educación Secundaria Carreño Miranda. Amás, compatibiliza’l so oficiu cola so condición d’entrenadora de surf tantu na Federación Española como na territorial.
Antes de formar parte del cuerpu técnicu de dambes federaciones, esta avilesina foi deportista d’altu rendimientu y participó en dellos campeonatos europeos y mundiales de surf. «Llégate un momentu nel que tienes que decidir ente trabayu y deporte porque nun ganamos la vida col surf, asina que dediqué a la enseñanza», esplica. «La Federación Asturiana ufiertóme’l branu pasáu formar parte del cuerpu técnicu nel Campeonatu por Autonomíes que ganamos tanto na modalidá de surf como na de longboard. A partir d’ende, el branu pasáu hubo un cambéu na dirección deportiva de la Federación Española y ufiertáronme llevar el longboard», recuerda Yumey González.
Seleccionadora nacional
El so trabayu como entrenadora del organismu federativu nacional consiste en «allegar a toles competiciones a nivel nacional ya inclusive los acompaño a les internaciones y, según les sos resultancies y momentu de forma son llamaos pa la preselección. Colo que veo ellí y fui viendo nos campeonatos, decido quién son los que tán en meyores condiciones pa representar a España nes competiciones». afirma.
El longboard ye una modalidá deportiva dientro del surf que cada vez tien más reconocencia, non yá a nivel de prauticantes, sinón tamién d’aficionaos, y qu’esixe un tipu d’habilidaes y maniobres distintes nes pruebes d’altu nivel. Les tables tienen que midir a lo menos 275 centímetros, lo qu’obliga a «aprovechar tola tabla con fluidez y estilu, y tener control hasta asitiar los dos pies na punta». «Ye más visual que’l surf tradicional y de técnica los dos tienen la so dificultá. El longboard ye más calmu, mientres el surf ye más agresivu de potencia y velocidá», esplica la entrenadora avilesina de la Selección Española.
