Una superproducción al altor de ‘Los xuegos de la fame’ ta rodándose yá en dellos espacios naturales d’Asturies con un equipu de más de 300 persones, decenes de coches y camiones, y unos helicópteros que, magar tar prohibíu que sobrevuelen espacios protexíos como’l Parque Natural de Somiedu, tán utilizándose para llevar a cabu’l rodaxe.
Como yera d’esperar, el rodaxe de ‘Amanecer na collecha / Sunrise on the Reaping’, la quinta entrega de la saga, xeneró discutiniu. Ente que les autoridaes locales ven esta película como una oportunidá para «promocionar Asturies» —según afirmó Belarmino Fernández, alcalde de Somiedu, a LaSexta—, sectores ecoloxistes protestaron polos inconvenientes y l’impactu que puede tener esti rodaxe na naturaleza local.
La Coordinadora Ecoloxista d’Asturies denunció públicamente l’usu d’helicópteros mientres el rodaxe, que sobrevolaron a baxu altor zones acutaes del parque’l pasáu llunes 28 de xunetu. Según esta organización, los vuelos usáronse para tresportar material de grabación, pero travesaron espacios protexíos onde ta espresamente prohibíu faelo, salvu en casos escepcionales.
“Estes molesties pueden llevar a que delles especies abandonen la zona o alterien el so comportamientu natural debíu al estrés”, afirmó la Coordinadora nun comunicáu a los medios.
Amás, dellos vecinos y turistes del Valle del Llagu tuvieron que camudar los sos itinerarios habituales pola mor del rodaxe.
Y tu, ¿qué opines d’esta noticia? ¿Trátase d’una oportunidá pa impulsar el turismu o d’una amenaza a la redolada natural?
