El bateo de Navelgas sí que ye d’oru: un mundial «para la hestoria» que coronó a esti ganador. El presidente de l’Asociación Mundial de Bateo d’Oru, el sudafricano Sanjay Singh, llévase’l campeonatu al pie de la finlandesa Pia Makela, que celebró la so lluna de miel na localidá tinetense. LNE
El presidente de l’Asociación Mundial de Bateo d’Oru (World Goldpanning Association), el sudafricano Sanjay Singh, coronóse ayeri como campeón mundial en Navelgas. La so felicidá yera notable y compartida cola finlandesa Pia Makela que se fixo col tronu femenín d’un campeonatu onde tou salió como la flor de la maraviya. «Esti campeonatu marca una dómina, un antes y un dempués na hestoria del bateo d’oru», sorrayó emocionáu César Castañu, presidente de l’asociación de bateadores Barciaecus qu’entamó un eventu que cuntó cola collaboración de LA NUEVA ESPAÑA.
«Póngo-y una nota de venti sobro diez y nun ye solo la mio opinión, sinón la de toos», señaló Singh pa quien el Campeonatu Mundial de la localidá cuartana va ser imborrable. Llogró la so primera y única medaya nel anterior mundial asturianu, en 2015, y agora repite a lo grande. «Ye daqué increíble, nun tengo palabres. Toi recibiendo enforma amor y veo a tola familia del oru xunida», señaló Singh.
P’amor el de la flamante campeona del mundu que recibe la reconocencia en plena lluna de miel. La hestoria tien miga porque Pia Makela empezó la so hestoria d’amor con Ari Nissila en 2015, nel primer mundial celebráu en Navelgas y agora torna acabante casase. «Toi bien arguyosa, encántame Navelgas y esta ye la meyor competición del mundu», sorrayó.
N’imaxes: La emotiva ceremonia de clausura
del Campeonatu del Mundu de Navelgas / T. Casccudo
Por equipos el país ganador foi Alemaña, siguíu en segunda posición per Italia y en tercer puestu pola República Checa. En cuanto al XXIV Campeonatu Nacional de Bateo, el primer puestu femenín foi p’Alicia Rifaterra, ente que na categoría masculina trunfó Pelayo Monesteriu, consagrándose como’l meyor local. El cuartanu, de 26 años, amosóse arguyosu del so primer gran trunfu. «Empecé de pequeñu, con 4 o 5 años, ye una tradición en Navelgas y si Divos quier, voi siguir bateando tola vida», señaló arguyosu del so pueblu y del so trunfu.
Esi arguyu compartiólo César Castañu: «volvimos consiguir el meyor campeonatu de la hestoria, col meyor recintu y tamos bien contentos cola resultancia de la competición, qu’estrenó innovaciones como los pulsiadores inalámbricos que funcionaron a la perfección». El campeonatu de récord, onde s’algamen los 600 bateadores, echa’l telón. Ello ye que la ceremonia de clausura incluyó’l trespasu de la bandera a los representantes de la delegación de Nueva Zelanda, país que se va ocupar de la organización del campeonatu de 2026.
Antes de la entrega de premios tuvo llugar un plantíu de dellos pumares nel Navelgas Arena, según un escanciáu colectivu pa celebrar que la cultura sidrera ye Patrimoniu Cultural Inmaterial de la Humanidá. A la cita asistió’l director xeneral de Xestión Forestal, Javier Vigil, que defendió la sidra como «l’oru líquido d’Asturies, que sigue siendo l’alma de la nuesa tierra y tradición». Vigil participó nel plantíu d’unu de los pumares, al igual que l’alcaldesa de Tinéu, Montse Fernández.
La directora del Muséu del Oru de Navelgas, Alba Iglesias, exerció de maestra de ceremonies na clausura y dexó bien claro que’l próximu retu de los de Navelgas ye llograr ser Fiesta d’Interés Turísticu Nacional: «Los retos encántennos y sálennos bien amás».
