Y a la tercera foi la vencida: asina superó Xixón el so propiu récord d’escanciáu de sidra. La sablera de Poniente, contra vientu y marea, axunta a 9.833 escanciadores. Un aceleríu final en forma de cola que llegó a «Les Letrones» dexó superar la cifra del 2022, magar que mientres tola tarde sopló un fuerte vientu y cayó daqué d’agua: «Ye importante para nós». LNE / El Comercio / RTPA
El récord yá ye oficial: 9.833 persones participaron na 34ª edición de la sablera de Poniente, superando les 8.903 del añu pasáu y les 9.796 de va trés años, rompiendo la marca que paecía intocable.
La ciudá llogró lo que munchos consideraben imposible. La imaxe final va quedar grabada na memoria: cientos d’asistentes entrando a última hora, una cola qu’algamaba Les Letrones y una ovación colectiva al sabese que’l récord yá yera hestoria. «Consiguímoslo», brindó l’afición.
La organización repartió más de 8.000 botelles de sidra de la nueva collecha con denominación d’orixe amparaes pol Conseyu Regulador y otros tantos vasos que s’apurrieron a caúna de les persones qu’entraba a la cortil peles trés víes d’accesu habilitaes y que yeren cuntaes por personal dotáu d’aparatos cunta ganáu.
Pasaes les 21:15 hores, una notaria certificó que la suma de participantes llegara a 9.833 y que por tantu se rexistró un nuevu récord, n’una ceremonia festiva venceyada a la sidra que forma parte de les tradicionales fiestes del branu na ciudá.
La Fiesta de la Sidra Natural de Xixón celebró esti branu’l so 34ª edición y foi declarada d’Interés Turísticu Rexonal.
El Conseyu Regulador de la Denominación d’Orixe Protexida apostó pol festival al considerar que contribúi a “averar la sidra calidable, qu’inda tien una imaxe de selecta y *eclusiva” a la xente y al sector de la hostelería.
