Prepárase una prospección xeofísica pa conocer la dimensión de los edificios alcontraos. Una habitación romana decorada con pintura mural y restos d’actividá testil. Ye l’últimu atopamientu de la campaña arqueolóxica en Lucus Asturum, en Llanera. Yá nun tán escavando, pero’l trabayu sigue nel llaboratoriu.
Nos díes vinientes llevaráse alantre una prospección xeofísica con xeorradar col envís d’afitar per ónde s’esparderán los restos de los edificios descubiertos esti añu.
La casa de dómina altu imperial asitiada per baxo d’una necrópolis medieval y los restos de lo que podría ser un edificiu eclesiásticu de grandes dimensiones ta ente los atopamientos d’esta campaña, na que destaca tamién un osariu infantil con restos de más de 35 neños y neñes y abondes ayalgues y monedes.
Pieza a pieza, Lucus Asturum va revelando’l so pasáu; pero los arqueólogos tiénenlo claro, entá queda muncho por salir a la lluz.
