Cultura invierte cerca de mediu millón d’euros nel programa ADN. Asturies, Deporte y Naturaleza que va llevar foros, aules abiertes y eventos deportivos per toa Asturias. El proyectu del Gobiernu supón el reconocimientu del Principáu como Rexón Europea del Deporte 2025. La programación refuerza’l papel del deporte como ferramienta de vertebración territorial y dinamización de los conceyos. Asturies va albergar la Copa Iberdrola de Boxéu y la lliga kárate junior, sub-21, veteranu y parakárate. Actualidá Asturies
La conseyera de Cultura, Política Llingüística y Deporte, Vanessa Gutiérrez, presentó güei nel pabellón del Principáu na Feria Internacional de Muestres d’Asturies (FIDMA) el programa formativu del proyectu ADN. Asturies, Deporte y Naturaleza, una iniciativa qu’incluye 8 foros temáticos y 5 aules abiertes de formación especializada en más de 30 conceyos, amás d’actividaes per tola comunidá.
“ADN nun ye una programación puntual, ye una forma d’entender Asturies, una política pública que naz del convencimientu de que’l deporte y la naturaleza son dos pilares esenciales de la nuestra identidá como comunidá, que dende’l Gobiernu d’Asturies afitamos dende los valores de la igualdá, la inclusión y el compromiso cola sostenibilidá”, afirmó la conseyera.
La programación presentada pola conseyera y que supón una inversión averada al mediu millón d’euros esti 2025 val pa celebrar el reconocimientu del Principáu como Rexón Europea del Deporte 2025 al traviés del proyectu ADN, que ta enfocáu na unión ente turismu y naturaleza y la puesta en valor del escenariu natural que constituye Astures pa practicar deporte.
“Queremos que’l deporte tea presente en cada llugar d’Asturies. Que seya una ferramienta de cohesión y equilibrio territorial, de salú pública y
igualdá ente les persones, y de dinamización económica de tol territoriu”, subrayó Gutiérrez.
Nesti sentíu, ADN. Asturies, Deporte y Naturaleza busca promover un estilu de vida activu y saludable, al tiempu que fomenta la integración de l’actividá física na identidá cultural y social asturiana al traviés de modalidaes accesibles, inclusive, igualitaries, solidaries y respetuoses col mediu ambiente.
La programación presentada esta mañana incluye 8 foros temáticos, centraos n’arees como deporte y naturaleza, desenvolvimientu rural, avieyamientu activu, deporte adaptáu, deportes tradicionales o salú; y 5 aules abiertes de formación especializada pa deportistes, entrenadores, dirixentes y profesionales del ámbitu físicu y de la xestión deportiva. A ello súmense campeonatos autonómicos, competiciones nacionales, xornaes divulgatives y eventos singulares repartíos per tol territoriu, a los que se van siguir añadiendo actividaes a lo llargo del añu.
Nel so percorríu inicial nesti 2025, la conseyería impulsó dientro del proyectu ADN actividaes como la Xornada Muyer y Deporte en La Morgal, el Festival de Monte en Payares, la Xornada Deporte pa una vida n’Avilés o el Foru de Deporte Adaptáu en Les Arriondes, que combinaron charles, talleres y esperiencies práctiques.
Eventos programaos vinientes
El calendariu d’actividaes d’ADN pa les selmanes vinientes incluye la tradicional prueba d’Esquí Hierba en Payares, que se va celebrar el 24 d’agostu o’l Foru “Deporte y desenvolvimientu rural”, previstu pal 28 d’agostu en Santalla. En setiembre va garrar el relevu l’oriente d’Asturies, con un foru que se va celebrar el día 18 en Llanes onde se va tratar la importancia de los eventos deportivos como atractivu turísticu xenerador d’emplegu y pilares de la identidá; mentes que l’avieyamientu activu va protagonizar los actos entamaos n’Asturies por cuenta de la Selmana Europea del Deporte, qu’ente los díes 23 y 27 de setiembre van llevar meses redonde y actividaes a nueve conceyos asturianos.
Ente los eventos adelantaos güei pola conseyería pa los meses vinientes del añu, destaca la lliga kárate junior, sub-21, veteranu y parakárate nel Centru Deportivu “Juan Carlos Beiro” de Llangréu n’ochobre y la celebración de la Copa Iberdrola de Boxéu en Xixón nel mes d’avientu.
Una plataforma dixital pa centralizar tola información
Como parte del proyectu, la conseyera presentó, acompañada de la directora xeneral d’Actividá Física y Deporte, Manuela Ena, la páxina web www.adnasturies.com, disponible en castellanu, asturianu y eonaviegu. Esti recursu nuevu va funcionar como un puntu d’alcuentru y referencia pa la ciudadanía, deportistes, clubes y entidaes, ufiertando información actualizao sobre toles actividaes, foros, aules abiertes y eventos incluyíos nel calendariu ADN.
La plataforma va dexar consultar por conceyu, fecha o temática les propuestes, descargar programes completos, acceder a recursos formativos, inscribise n’actividaes y siguir en tiempu real les novedaes del proyectu. Tamién va incorporar conteníos audiovisuales, reportaxes y material gráfico de los eventos yá celebraos, amás d’enllaces a les redes sociales oficiales pa fomentar la participación y la interacción cola comunidá.
Con esti portal, el Principáu quiere garantizar que tola información tea centralizao, accesible y permanentemente actualizao, reforciando la proyección del proyectu y facilitando que la población pueda planificar y disfrutar de la ufierta deportiva y de naturaleza qu’ ADN tien pa ufrir.
Con ADN. Asturies, Deporte y Naturaleza, la Conseyería de Cultura, Política Llingüística y Deporte contribuye al desenvolvimientu d’un modelu deportivu qu’integra naturaleza, salud, inclusión y sostenibilidá, y qu’asitia a Asturies como un referente nacional e internacional na promoción de la actividad física vinculada al nuestru privilexáu entornu natural.
