Sanjay Singh, presidente de l’Asociación mundial de bateo d’oru: «El bateo axunta a xente de toles cultures, tien el valor de la unidá». «Diba años que nun había tantos participantes nesti campeonatu, lo que demuestra que somos una actividá viva». LNE
Sanjay Singh, cola so batea, na área de competición del Navelgas Arena. | DEMELSA ÁLVAREZ
Sanjay Singh ye’l presidente de l’Asociación Mundial de Bateo d’Oru (World Goldpanning Association) dende va seis años y esta selmana atópase en Navelgas esfrutando del Campeonatu Mundial de la modalidá (actividá que cunta cola collaboración de LA NUEVA ESPAÑA) non solo como representante, sinón como bateador.
Con él viaxó una delegación de participantes ya inclusive la ministra de Cultura, Deportes y Recreación de Mpumalanga (Suráfrica), Leah Martha Mabuza. Ello ye que Sanjay Singh trabaya nel Ministeriu y la so función xira en redol a la preservación y caltenimientu de la hestoria y el patrimoniu, que na rexón sudafricana de la que proceden ta bien venceyada al oru.
-¿Qué significa para usté tar en Navelgas?
-Foi un añu d’espera provecía. Lo más guapo ye que, tando n’África, sentíme como si tuviera nes sos xuntes, había una comunicación constante. Asina que cuando llegué equí sentí que yera parte del equipu, non daquién de fuera. Los españoles trabayen duru y faenlo con pasión.
-¿Cómo valora la organización del campeonatu?
-Esti campeonatu marca un nuevu estándar, un nuevu modelu para’l futuru. El comité organizador d’España inclúi tantu a mozos como a persones con esperiencia y les resultancies d’esa estratexa tán a la vista. Nunca antes tuviéramos más de 500 participantes preinscritos, preregistrados y con pagu antemanáu, ente otres novedaes. Creo que’l secretu del ésitu d’esti campeonatu ye qu’España nun trabayó sola. Trabayó con otros países. Pidió ayuda. Supo delegar. Supo confiar.
-¿Qué significa’l bateo d’oru na rexón sudafricana que representa por que viniera tamién la ministra de Cultura na delegación?
-Lo prioritario pal Gobiernu sudafricano ye la construcción de la nación y la cohesión social. Hai que recordar la hestoria de Suráfrica, cuando vivíamos separaos, onde lo bono yera solu pa les persones blanques y lo malo pa les persones negres. Agora’l Gobiernu esfórciase enforma por xunir a tol mundu. Nel Departamentu de Cultura, Deporte y Recreación siguimos esi mandatu y buscamos actividaes que xunan a les persones. Al traviés de los servicios museísticos y de patrimoniu vimos qu’esta actividá ye única pa esta provincia y qu’amás consigue axuntar a persones de toles cultures, edaes, xéneru… Por eso’l gobiernu puede sofitar el bateo. Los bateadores van pensar que’l gobiernu sofita’l deporte. Pero lo qu’en realidá sofitamos ye la construcción de la nación y la cohesión social.
-¿Qué apurre esa diversidá a esta disciplina?
-Demuestra qu’hai un espaciu nel que podemos convivir n’harmonía y en paz los unos colos otros nun mundu llenu de guerres y enfrentamientos. Equí naide sabe cuál ye l’oficiu del otru, a naide impórta-y eso, solo importa que somos una familia la «Golden Family» y la mio responsabilidá ye promover esta unidá global y el valor de tar xuntos.
-¿En qué momentu ta’l bateo d’oru?
-Si repara l’eventu en República Checa l’añu pasáu y este n’España, diba años que nun había tantos participantes. Y esi númberu demuestra que nun somos un caballu morrebundu. Somos una actividá viva. La xente llámalo la “Golden Family” porque siente que pertenez a ella. Y mientres sientas que perteneces, vas volver. Amás, ver que cualquier gobiernu quier implicase en daqué que nin se conoz, ye porque ve un valor. Nesti casu, el de la unidá, el de qu’una pequena actividá, nun pequenu pueblu puede faer qu’España apaeza en medios nacionales ya internacionales.
-Tamién se trabaya p’atraer a les nueves xeneraciones.
-Va unos años l’asociación tomó la decisión d’introducir una categoría non oficial familiar y #cada país tien programes pa la mocedá. En Suráfrica tenemos un programa escolar col que faemos actividaes en colexos, un campeonatu escolar que sirve pa escoyer a quien van dir a los campeonatos nacionales, que nun paguen inscripción, subvencionales el departamentu de Cultura del gobiernu.
-¿Qué conseyu daría pa practicar esta disciplina con ésitu?
-nun voi contestar a eso. Pero lo que sí voi dicir ye que, pa caltener y protexer la tradición del bateo d’oru, tenemos que pensar en cómo yera esto fai cientos d’años, cuando s’afayó l’oru nos ríos. Usaben equipamientu tradicional y gustaríame qu’en les nueses competiciones hubiera un equilibriu mayor ente equipamientu tradicional y de velocidá. Tocantes a técnica, toos tienen d’aprender a lleer el sable. Porque en cada eventu, el sable pórtase de manera distinta. Si sabes lleela bien, vas saber remanala.
