Mediu Rural abre la convocatoria d’ayudes pa impulsar los Mercaos del Paraísu Natural’, dotada con 60.000 euros. Les entidaes locales y asociaciones ensin ánimu d’arriquecimientu van poder presentar les sos solicitúes hasta’l día 23 d’ochobre Esta media pretende fomentar el consumu de proximidá y dinamizar los pueblos. Actualidá Asturies
El Gobiernu d’Asturies publicó güei nel Boletín Oficial del Principáu (Bopa) la convocatoria d’ayudes a entidaes locales y asociaciones ensin ánimu d’arriquecimientu pa impulsar la organización de Mercaos del Paraísu Natural. Esta iniciativa estratéxica de la Conseyería de Mediu Rural y Política Agraria, dotada con 60.000 euros, pretende fomentar el consumu de proximidá y dinamizar el mediu rural.
Les entidaes locales y asociaciones ensin ánimu d’arriquecimientu interesaes n’aportar a estes ayudes van poder presentar les sos solicitúes hasta’l 23 d’ochobre.
La nueva marca ampara los eventos centraos na vienta directa de productos agroalimentarios, especialmente aquellos incluyíos na marca calidable Alimentos del Paraísu Natural, símbolu d’orixe y sostenibilidá.
Esta iniciativa busca fortalecer el venceyu ente productores y consumidores, impulsar la economía local, caltener el paisaxe rural y favorecer circuitos curtios de distribución.
Van poder acoyese a esta llínea d’ayudes los mercaos celebraos n’Asturies dende’l 1 de payares de 2024 y hasta el 31 d’ochobre d’anguaño, siempres y cuando cunten a lo menos con 20 puestos de vienta y tengan una duración mínima de seis hores. Los eventos van poder comercializar productos amparaos por Alimentos del Paraísu Natural, según otros elementos agroalimentarios, producciones locales y artículos certificaos por Artesanía d’Asturies. Tamién van poder cuntar con chigres o*gastronetas (foodtrucks), si la so ufierta básase, siquier en parte, n’alimentos autóctonos.
Estes ayudes, financiaes íntegramente con fondos del Principáu, van concedese en réxime de concurrencia competitiva por aciu una convocatoria pública añal. La cuantía va asignase en función de criterios como’l tamañu de la localidá onde se celebra’l mercáu, la so duración y númberu de puestos, la ufierta d’actividaes complementaries (especialmente pal públicu infantil) y la cantidá de productos amparaos por marques calidable o aptos pa persones con intolerancies, ente otros factores.
Con esta iniciativa, el Principáu refuerza’l so apueste por un modelu agroalimentario sostenible, calidable y venceyáu al territoriu nel que los Mercaos del Paraísu Natural van ser una ferramienta clave de promoción, comercialización y desenvolvimientu rural.
