y da-yos a tolos participantes l’aplausu fuerte que merecen 
Nin París nin Milán: la capital de la moda ye Grau y estos son los ganadores del concursu de traxes tradicionales asturianos. El certame axuntó a 27 participantes, con creaciones que retruquen fielmente los usos nel vistir de finales del sieglu XIX n’Asturies
Nin París, nin Nueva York, nin Milán. La capital de la moda foi esti domingu Grau, y non d’una moda cualesquier. Pola pasarela moscona desfilaron ente aplausos un total de 27 creaciones dientro de la décima edición del concursu «Indumentaria», dientro del Día’ l Traxe. Xunas más luxoses qu’otres, toes con igual valor pola so singularidá: retruques fieles de los paxellos que llevaben los asturianos de finales del sieglu XIX, munchos d’ellos basaos en refechos estudios documentales, toos ellos cuayaos de detalles.
Hubo vestimientes d’home y de muyer, de diariu y d’ocasiones especiales, de criaos y de pudientes, y toes elles llamaron l’atención del numberosu públicu qu’anguaño asistió al desfile nel frontón del Parque de riba énte l’amenaza d’agua.
Foi xuna edición colorida, con muncho terciopelu y ringorrango, perendengues (pindios) orixinales del sieglu XIX, cintes, cadenes y relóes, corales, capes, dengues y mandiles con pasamanería, sedes, refaxos superpuestos de dellos colores, xustillos p’abrigar meyor el cuerpu, medayes, zapatos y botes de piel y tamién escarpinos, madreñes y estameñes, paños más bastos que se estilaban ente les clases trabayadores.
Semeyes de Lucía Garó Fotografía— en Grau, Asturies.
