Pasaron 6 años dende la última edición d’esti festival fundamental que dende 1989 lleva puxando pola música y la reivindicación llingüística; amosando en tou esti tiempu la diversidá sonora de la escena n’asturianu.
Pasaron siete años dende que Xixón acoyó’l XXX Conciertu Pola Oficialidá y seis desque la Xunta Pola Defensa de la Llingua Asturiana entamara nel Teatru Palacio Valdés d’Avilés La Banda Sonora de la Oficialidá, un espectáculu históricu col que festexó trenta años d’esti festival míticu de música y reivindicación llingüística. Muncha yera la xente que taba naguando pola vuelta d’esta cita fundamental cola música n’asturianu y anguaño llegó’l momentu.
La Xunta Pola Defensa de la Llingua Asturiana anunció que’l sábadu 22 de payares los Kuivi Almacenes d’Uviéu van acoyer la XXXII edición del Conciertu Pola Oficialidá. Entá nun hai más información, pero’l colectivu de reivindicación llingüística va dir asoleyando a traviés de les sos redes sociales tolos detalles d’esti eventu tan esperáu.
El Conciertu Pola Oficialidá entamólu la Xunta Pola Defensa de la Llingua Asturiana per primer vez en 1989 nel Parque’l Muelle d’Avilés. Daquella tocaron la Banda Gaites Naranco, el Grupu Gaites Urriellu, Balandrán, Llan de Cubel, Dixebra y The Podres. Dende esi momentu esti festival foi puxando a lo llargo de tou esti tiempu por amosar la diversidá sonora de la música fecha n’asturianu, axuntando enriba l’escenariu folk, rock, asturianada, rap, hardcore, reggae, punk, electrónica… Too ello por una causa xusta: reivindicar la necesaria oficialidá de la llingua asturiana.
