L’Asociación Escontra’l Raigañu entama una edición nueva de les Xornaes d’Estudiu, actividá que s’enmarca dientro del so Aula Didáctica de Cultura Popular Asturiana. El folclore del centru d’Asturies. Pasáu y presente ye’l nome d’esta xornada que’l sábadu 27 setiembre va estudiar esta cuestión. La matrícula yá ta abierta por un preciu de 20 euros y les inscripciones pueden facese a traviés del corréu escontralraiganu@gmail.com.
«Vamos tratar una de les zones más estenses nes que se zonifica el mapa d’Asturies cuando falamos del repertoriu de bailles y danza: la zona Central d’Asturies y, en particular, vamos analizar trés de les pieces fundamentales del repertoriu como son la ‘jota’, la muñeira y lo llixero«, anunció Escontra’l Raigañu a traviés de les sos redes sociales pa presentar esti cursu.
La programación entama a les diez de la mañana cola Introducción al repertoriu de bailles de Centru que va impartir Fernando de La Puente, profesor de baille, danza tradicional y investigación aplicada na Escuela de Música Tradicional d’Uviéu. De 12.30h a 14h el componente d’Andecha Folclor d’Uviéu, Sergio Velasco, va afondar en La práutica de la ‘jota’ y, tres d’una posa pa xintar, de 16h a 18h va centrase en La práutica de lo llixero y de la muñeira. La programación zárrase Acompañamientos rítmicos nel repertoriu de bailles del Centru, al cargu de Ramsés Ilesies, profesor de baille y percusión en delles escueles de música tradicional y responsable, xunto con Xosé Ambás, nel ATOAM.
