El Principáu empecipia les obres del nuevu Colexu d’Educación Especial Montecerrao, n’Uviéu. L’equipamientu, axudicáu en 18,91 millones, va convertise na mayor inversión realizada n’Asturies nun centru educativu. La conseyería encargó yá la redacción del proyectu de la piscina. Actualidá Asturies
El Gobiernu del Principáu empecipió esta selmana los trabayos para la construcción del Colexu d’Educación Especial (CEE) Montecerrao, n’Uviéu. La obra, axudicada en 18,91 millones a la empresa Ogensa, tien un plazu d’execución de 24 meses.
L’equipamientu va suponer la mayor inversión realizada n’Asturies nun centru educativu públicu, yá que va superar al Institutu de Secundaria Margarita Salas, inauguráu esta selmana, y que costasti 17,28 millones. La obra va financiase en trés exercicios: 1,65 millones anguaño, 11,66 en 2026 y 5,6 en 2027.
El colexu proxectáu pol arquiteutu Jovino Martínez Sierra– va ocupar una superficie construyida de 9.311 metros cuadraos, distribuyida en cuatro altores gradiaos: planta baxa, planta primer y dos sótanos. L’edificiu consta de dos zones enllazaes en forma d’O, empobinaes al sur y con dos patios esteriores.
L’inmueble va disponer de 57 aules flexibles de múltiples tamaños, amás d’otros trés específiques de música, estimulación sensorial y psicomotricidad. Va haber, amás, 14 aseos afechos, un salón d’actos para 215 persones, patios cubiertos, pista polideportiva, biblioteca, área de cocina y dos comedores.
Per otru llau, Educación encargó a finales de xunetu la redacción del proyectu básicu y d’execución d’una piscina nesti centru. El costu d’ese proxecto xube a 16.262 euros ya inclúi la ellaboración del estudiu de seguridá y salú. El plazu d’entrega axustáu nel contratu ye de dos meses. La piscina va allugase na área que primeramente se diba a destinar a la estimulación hídrica, anque va ocupar tamién una zona allegante.
