Asina ta esta mañana l’abellugu de Colláu H.ermusu, na vertiente llionesa de los Picos d’Europa, como habiemos anunciáu la nevada nes zones más altes de los Picos d’Europa diba dar de falar.
- Alborecemos col cielu nuboso y xarabatos tormentosos ya intermitentes que son de nieve perriba de los 1800-1900m con unes temperatures que tan alrodiu de los 11ºC, rexistrándose nel puirtu Payares 2,1ºC.
- Güei vamos tener xarabatos intesos y xeneralizaos que puen venir acompangaos de truena y xarazu, sobre too nel interior asturianu, siendo menos frecuentes ya intensos nel llitoral con tendencia a remitir al atapecer. Les temperatures en descensu y la nieve va tar presente pela mañana sobre los 1800-1900m pa dir subiendo pela tardiquina hasta los 2100-2200m. L’aire de componente noroeste con raches fuertes en zones altes ya en puntos del llitoral.
- Mañana martes vamos tener intervalos nubosos entemecios ente dellos claros o abancios, nun se descarta que puea cayer dalguna gotera dispersa ya ocasional con unes temperatures mínimes en descensu, perdebaxu de los 10ºC y con les másimes en llixeru ascensu. L’aire tenderá a rolar a nordés con dalguna racha moderada nel llitoral y zones altes.
- El miércoles seguiremos teniendo temperatures mínimes baxes y el cielu va dir aclarándose pa quedar pela tarde escampláu. L’aire nordés va ser cafiante na costa y ellí onde nun temos abellugaos d’él l’ambiente, a pesar del sol, sedrá fríu.
- El xueves ya vienres sedrán díes soleyeros y lluminosos pero con temperatures contenies, malpenes algamándose los 20ºC al mediudía, anque amenorgará dalgo’l nordés seguirá cafiante na costa.
- Paez que la fin de selmana tendremos más nubes y fadrá dalgo más de calor pero esto yá lu diremos viendo.
