«El Monte de les Asturianes» nel Himalaya: Rosa Fernández y Azucena Collar conquisten unu visu virxe. La Voz
Les alpinistes faen cume tres un segundu intentu que simboliza «la constancia, el trabayu n’equipu y los nuesos raigaños»
Les montañeres asturianes Rosa Fernández y Azucena Collar algamaron el visu d’un monte virxe n’una remota rexón del Himalaya indiu, dempués d’un esixente acercamientu ensin caminos y n’aplicando la esperiencia adquirida n’una espedición previa l’añu anterior.
El cume, ensin nome oficial nin rexistros d’ascensos anteriores, foi bautizada pol equipu como «El Monte de les Asturianes», n’homenaxe al doble intento realizáu por muyeres d’Asturies en dos años consecutivos.
«En 2024 vini con Isabel Argüelles, compañera asturiana. A los dos díes d’acercamientu tuvimos qu’arrenunciar polo inaccesible del terrén, y finalmente decidimos esguilar otru monte virxe, onde quedamos a pocos metros del visu por una inmensa cornisa. Anguaño, con Azucena, tornamos meyor preparaos, n’otra dómina colos ríos más baxos y cola esperiencia de raspiar yá aquel glaciar. Eso facilitó l’aproximamientu y dexónos algamar el cume. Esti monte simboliza la constancia, el trabayu n’equipu y los nuesos raigaños», esplica Rosa.
Según espliquen les alpinistes, el terrén plantegó grandes dificultaes, con progresión sobro morrenes glaciares y ausencia de caminos definíos hasta’l campamentu base. Dende ellí, l’ascensu realizose n’estilu clásicu y autosuficiente, ensin cuerdes fixes nin porteadores d’altor. «Más que una cume, foi cerrar un ciclu. El monte esperónos un añu, y esta vegada abriónos les sos puertes dempués de muncho esfuerzu compartíu», añede Azucena.
Na espedición tamién participó Robin Walker, montañeru residente n’Asturies, que’l so sofitu resultó esencial pa crear un ambiente d’enfotu y cooperación, espliquen les alpinistes.
Detalles de la espedición:
- Allugamientu: Himalaya indiu (Himachal Pradesh), zona ensin rexistros previos d’ascensu
- Altitú envalorada: 5.694 metros
- Estilu: ascensu clásicu, ensin cuerdes fixes nin porteadores d’altor
- Equipu: Rosa Fernández, Azucena Collar y Robin Walker
