El presidente inaugura la primera escuelina d’Uviéu de la rede autonómico y gratuito para alumnáu de 0 a 3 años. Carbayoninos cuenta con dos sedes, una en San Llázaro y otra en Les Campes, y 37 neñes y neños matriculaos. El presidente del Principáu, Adrián Barbón, asistió güei a l’apertura de la escuelina Carbayoninos, d’Uviéu, la primera de la rede autonómica, pública y gratuita de Les Escuelines/As Escolías que s’inaugura nesti conceyu. El conceyu yá cunta con otros siete centros de 0 a 3 años de titularidá municipal. Actualidá
Barbón tuvo acompañáu pola conseyera d’Educación, Eva Ledo; la directora xeneral de Centros y Rede 0-3 Años, Paula Fernández; el director xeneral d’Infraestructures y Tecnoloxíes Educatives, Julio Vallaure; y la *conceyala d’Eduación nel Conceyu d’Uviéu, Lourdes García.
Esta nueva escuelina –la decimoctava de la primer fase de la rede autonómica– consta de trés unidaes distribuyíes en dos sedes: una unidá nel Colexu Públicu (CP) Juan Rodríguez Muñiz-Les Campes y otros dos nel Colexu Públicu San Llázaro-Escueles Blanques, que ye onde se realizó güei la visita.
La escuelina empieza la so andadura con 37 neñes y neños matriculaos. La plantiya ta formada por una directora docente para los dos sedes y seis técniques d’educación infantil (TEI): cuatro nes Escueles Blanques y dos en Les Campes.
El Gobiernu d’Asturies construyó esti nuevu centru con fondos europeos del Mecanismu de Recuperación y Resiliencia (MRR). La see de les Escueles Blanques tuvo un costu de 429.466 euros y la de Les Campes, de 231.803.
Con esta inauguración, la rede componse yá de 40 centros qu’imparten el primer ciclu d’Infantil y suma 918 neñes y neños matriculaos nestos momentos. De les 40 escuelinas, 18 formen parte de la fase I de la rede y les otres 22 yeren centros de titularidá municipal que s’integraron en septiembre na nueva estructura autonómica.
Siete unidaes más para Uviéu na fase II. Nel conceyu d’Uviéu, el Principáu tien programaes otres trés actuaciones dientro de la fase II de la rede: la construcción de trés unidaes nel CP La Xesta, otros trés el CP Pablo Miaja y una más nel CP El Villar, de Trubia. La inversión total va algamar los 730.446 euros. Güei mesmu haise robláu l’acta d’empiezu d’obra de les unidaes de La Xesta. Les otres dos tán yá axudicaes y a puntu d’empecipiase los trabayos.
El conceyu d’Uviéu tien otres siete escueles infantiles de 0 a 3 años, que la so integración na rede autonómica ta prevista para 2026.
