LNE / Adiós a los exames escritos de tola vida: la IA va camudar la forma d’evaluar nos colexos asturianos. «Los alumnos usen agora la intelixencia artificial como si fora daqué clandestín; el docente tien d’enseña-yos cómo y cuándo usala y esaminar el procesu en vegada del productu final, valorando la orixinalidá y la reflexón», aseguren los espertos en tecnoloxíes educatives. La escuela tien d’aprender a convivir cola IA. Nun hai más remediu. Va faer falta camudar la forma de dar clases y, sobremanera, d’evaluar.
Asina lo afirma Lourdes Villalustre, profesora titular del departamentu de Ciencies de la Educación de la Universidá d’Uviéu y esperta en tecnoloxía educativa. Según aprofia, na era de la intelixencia artificial yá nun tienen sentíu nin les clases espositives nin los deberes y exames de siempre, los que solo miren el productu final, los de memorizar y reproducir conteníos.
«El profesor yá nun ye ese centro d’información, tien que camudar el so rol y faer de mediador, de xestor de la IA», sostien Villalustre. Porque lo qu’ella mesma ta viendo nes aules de la Universidá d’Uviéu ye que los estudiantes nun saben cómo utilizar la IA na redolada educativa.
Úsenla, pero «como si fora daqué clandestín». «Hai que poner lluz a cómo utilizala, para qué utilizala y para qué nun se puede utilizar». Los alumnos tienen de saber que nun se trata de faer una copia y pega de lo que diz ChatGPT, yá que non siempres la información qu’apurre la maquinita ye veraz.
Esto lleva a camudar «por completu’l paradigma d’evaluación actual. Cola IA presente na nuesa vides, «yá nun podemos evaluar a los estudiantes polo qu’apurrieron, pol productu final, sinón qu’hai qu’evaluar el procesu». Ye lo que los espertos llamen «evaluación auténtica».
¿En qué consiste? N’utilizar nueves (o non tan nueves) metodoloxíes, como los portafolios dixitales, los estudios de casu o les defenses orales, y valorar otres cualidaes: la orixinalidá, el razonamientu qu’hai detrás d’un trabayu y la reflexón crítica, esplica la profesora de la Universidá d’Uviéu.
Exames orales. Josep María Castellà, profesor de Didáctica de la Llingua na Universitat Pompeu Fabra (UPF) , ve beneficiosu volver al exame oral. Una manera de faelo ye pidir al alumnáu que faiga’l trabayu con IA y dempués fae-y una entrevista oral sobro’l mesmu. Otra forma, exemplifica Castellà, d’incorporar la IA ye pidir al alumnáu qu’a la fin del un trabayu escritu añeda media páxina final na que declare qué programes usó y qué fixo con ellos –si usola pa la redacción, pa buscar el conteníu o pa correxir l’estilu y l’ortografía– y unas reflexones personales añedíes. A última hora, trátase de valorar el procesu.
L’asturiana Lourdes Villalustre, qu’imparte l’asignatura de Nueves Tecnoloxíes Aplicaes a la Educación, puntualiza que los exames orales y escritos pueden convivir. «Nun tien que ser tou oral, tou depende del conteníu y de la materia. Por casu, faer un exame oral de matemátiques igual ye un pocu complicáu».
¿Aprienden igual? Cola llamada evaluación auténtica, ¿los alumnos aprenderíen lo mesmo? Lourdes nun tien dulda: lo mesmo o más. «Cuando valoramos más esos procesos, tamos aplicando metoloxíes más actives y faemos más partes y protagonistes al estudiantáu, de forma que l’aprendizaxe vese ameyoráu». Sicasí, añede, «non puede dicise *categóricamente que por centranos nos procesos d’aprendizaxe va ser meyor, tou depende de cómo se plantege esi aprendizaxe».
La IA y toos lo cambeos qu’implica na educación, apunta la profesora de la Universidá d’Uviéu, «ye una oportunidá pa replanteganos cómo tamos desenvolviendo la nuesa docencia, qué metodoloxíes tamos aplicando y qué educación tamos llevando a cabu». «La sociedá actual ta totalmente dixitalizada y, poro, la escuela tien d’afaese a esti contestu».
Mandar deberes. Héctor Gardó, doctor en Ciencies de la Educación y director d’Equidá Dixital na Fundació Bofill, cavilga que más allá de la parte tecnolóxica, la entruga sobro los deberes na era de la IA apella enforma sobro qué ye educar y cuál ye’l papel del docente. Ye importante dexar de falar de qué –¿qué deberes mandar?- y empezar a falar de cómo y por qué.
«El productu (el trabayu final a apurrir) pue crealo la IA. Falemos de cómo tendría que ser el procesu: cómo soi críticu cola información qu’alcuentru, cómo la espongo, cómo la comparto colos mios compañeros… El productu final (el trabayu) ye xuna escusa. La IA convídanos a doblar l’apueste pola humanidá na educación, a preguntar al alumnu cómo lu hai fechu, qué opina d’ello, cómo se sintió faciéndolo, con quién lo fixo, cuándo…», detalla.
Gardó pon sobro la mesa xuna cuestión de caláu. «La investigación diz que l’usu indiscrimináu de la IA ta empiorando l’interés, la capacidá de plasmu. Si tienes les respuestes a tou, ¿pa qué tienes que pensar?».
Castellà ye un convencíu de la necesidá de «incorporar les novedaes» a la enseñanza por que les aules nun sían «demasiao distintos al mundu. Sócrates nun quixo escribir nin una llínea en tola so vida porque la escritura acabábase d’inventar y él consideraba que destruyía la conocencia y la filosofía. Conocemos a Sócrates por Platón. Él negóse a escribir y a aceptar una novedá de la dómina que s’impunxo».
Los apuntes, a mano. «Veníamos d’unos años d’una innovación bien lloca y, adulces, va abandonándose la idea de que cualquier cambéu ye bonu, que va desmontándose pola cruda realidá». Son palabres de Juan Fernández, profesor, investigador y autor de «En blancu: Cómo focalizar l’atención, la memoria y la motivación p’aprender», compartíes por infinidá de docentes de primaria y secundaria. Esa innovación demonizó aprender por aciu de la toma d’apuntes, práctica desterrada en munches escueles mientres años.
El profesor del Departamentu de Pedagoxía Aplicada de la UAB Màrius Martínez defiende como «una habilidá interesante que valdría la pena nun perder y una oportunidá d’aprendizaxe potente y pervalible». «L’aprendizaxe ye un procesu complexu nel que vas incorporando nel to patrimoniu escurres, valores y competencies. Ye bonu que l’alumnu escuche idees y conceutos, sepa discernir lo importante de too lo que ta escuchando y anótelo».
La selección de la información ye crucial. Nun ye trescribir, ye procesar la información del profesor ya identificar cuál ye la más relevante. «Ye como sorrayar, si sorrayes tou y dexes la páxina llena de colores pierde’l sentíu», prosigue’l profesor de la UAB. Ye imprescindible que’l profesoráu enseñe a tomar bonos apuntes. Nun hai que dar per sentáu que l’alumnáu sepa faelo.
«La diferencia ta en qué piensa la persona mientres toma apuntes. Tomar apuntes nun ye escribir lo que yo digo, sinón lo que tu pienses que yo digo; ye una bona acción porque ye un exerciciu d’interiorizar, conectar colo que yá sabes y espresalo de la manera que más encaxa colos tos modelos mentales», argumenta Fernández. «Ye explicitar les representaciones mentales qu’el to celebru va faciendo; pa tomar bonos apuntes hai que reivindicar de nuevu la importancia de les conocencies que t’ayuda a saber coses y a enfocar l’atención». Unu de los problemes actuales nes aules ye la falta de concentración.
Los apuntes nun son un productu final. Tienen que revisase. En secundaria, Martínez encamienta dexar un espaciu nos mesmos apuntes p’anotar entrugues o lo que nun s’entendió y dexar momentos en clase pa revisalos y comentalos.
¿Apuntes a mano o col ordenador? Fernández diz que n’ordenador ye más fácil que desconectes en dalgún momentu porque te llegó una notificación del móvil o del corréu electrónicu. A mano ye más difícil siguir el ritmu y obliga a procesar por aciu fleches, diagrames, abreviatures, mapes mentales… y amás apurre’l trabayu de la motricidá fina.
Hai un consensu xeneralizáu en que si quies aprender daqué precises procesalo y en que p’aprender coses complexes ye importante escribiles. Escribilo ye una forma d’apoderase de lo que te tán cuntando, d’incluyilo al to catálogu de modelos mentales. Non solo ye escribilo, ye tamién da-y organización gráfica como ponelo en forma de diagrames.
Afigurar en papel lo qu’entiendes, lo relevante y eso ye bonu porque hai niveles bien baxos de comprensión llectora y oral.
Los apuntes ameyoren la memoria al llargu plazu porque lo escribes y consolides. En la toma d’apuntes entra tamién saber esquematizar, daqué que se perdió a edaes tempranes, tamién porque tou va más tarde. Lo qu’antes se consolidaba n’infantil agora pasóse a ciclu inicial y lo d’inicial a ciclu mediu.
En tou ello ta d’alcuerdu Lourdes Villalustre. «Ye ciertu que nun ye lo mesmo tomar apuntes nuna pantalla del ordenador que tomalos de manera manuscrita, porque coles mesmes que tomamos apuntes a mano, tamos trabayando otres habilidaes y competencies que nos ayuden a afitar meyor los conteníos», espón. Na Universidá d’Uviéu, Villalustre yá vio de too: alumnos que nin siquier tomen apuntes, nin a mano nin a ordenador, sinón que faen semeyes col móvil a la presentación del profesor. «Eso yá ye’l cuelmu del cuelmu», diz.
Un exemplu de clase Ende ye clave la estratexa d’enseñanza de cada profesor. Villalustre, por casu, nun pon testos nes sos diapositives. Son idees bien esquemátiques que depués desenvuelve en clase. «Pídolos que nun reproduzan lliteralmente lo que voi esplicando dientro de l’aula, sinón qu’a cencielles tengan la capacidá d’escuchar y tomar les idees más relevantes que depués pueden completar usando otros recursos». Ende ye onde entra n’escena la IA y el papel del profesor d’emponer.
