- Alborecemos con grandes claros o abancios entemecios ente delles nubes medies y altes, amás sopla l’aire gallegu con fuercia na costa, mentantu nel interior nun se mueve una fueya con unes temperatures condicionaes pol vientu, ellí onde temos al abellugue d’él hai alrodiu de los 13ºC y na costa onde pega ronden los 18ºC, rexistrándose nel puirtu Payares 10,5ºC
- Güei va cruzanos d’oeste a este un frente poco activu que mos dexará al so pasu precipitaciones febles en xeneral pero primeru esfrutaremos tovía del sol. A partir del mediudía dirá aumentando la nubosidá rápidamente pa dexanos el cielu nuble, llegando primeru les precipitaciones pel oeste asturianu pa descargar a primera hora de la tarde na fastera central asturiana, amás vendrán acompangaes de vientu racheáu de componente noroeste y n’antes d’empezar les nubes baxes dominarán el territoriu.
- Mañana domingu va caltenese la nubosidá pero nun tendremos precipitaciones con unes temperatures en moderáu descensu col vientu nordés que sedrá cafiante na costa y baxará entovía más la sensación térmica.
- El llunes dirán abriéndose dellos claros o abancios y subirán les temperatures, sobre too de cara’l martes que volveremos a pasar calor.
- Miércoles y xueves tendremos más nubes y descenderán les temperatures y paez que la fin de selmana sedrá soleyera y calurosa pero esto yá lu diremos viendo. Onde pinta otra vegada mal ye pal Mediterranéu porque ye probable que se repita de cara a la fin de selmana viniente otra situación de xarabatos y bastiazos torrenciales.
