La Conseyería de Salú abre’l plazu de solicitú d’ayudes para la compra de gafes a menores de dolce años. Salú dedica 800.000 euros a esta nueva llínea de sofitu a les families, que va beneficiar a unes 8.000 persones. Actualidá
El Principáu dedica 800.000 euros a esta midida, que busca facilitar l’accesu equitativo de la población infantil a una bona salú visual y que va beneficiar a unes 8.000 persones.
La subvención, suxeta a la renta, algama los cien euros per menor, coles mires de llegar al mayor númberu posible de beneficiarios y algamar a tola población diana. Con esta cuantía pretende financiase el 50% del costu mediu d’unes gafes, un sofitu económicu significativu pa les families con menos recursos.
Esta midida ye pionera nel país. La Comunidá de Madrid ufierta una ayuda similar pa la compra de gafes a menores d’hasta 14 años con defectos visuales, pero llindada a 55 euros. Pela so parte, el ministeriu anunció una ayuda universal similar d’hasta cien euros per menor de 16 años, independientemente de la renta familiar o comunidá de residencia, qu’entá nun ta a valir.
Nel casu d’Asturies, va ser subvencionable el gastu de la compra de gafes graduaes pa la corrección de defectos de visión ensin incluyir na cartera de servicios comunes del Sistema Nacional de Salú (SNS) o, nel so casu, na cartera complementaria del sistema sanitariu del Principáu. Les gafes tendrán de ser prescrites por un médicu especialista n’oftalmoloxía o indicaes por un ópticu-optometrista, priváu o públicu.
P’aportar a estes ayudes ye necesariu tar empadronáu dende va un añu en cualquier conceyu d’Asturies y nun superar los 60.000 euros de renta per unidá familiar.
Con esta actuación, el Principáu favorez la igualdá d’oportunidaes, el rendimientu académicu y el desenvolvimientu integral de los menores. Promueve, amás, l’atención temprana a problemes visuales que, de nun ser correxíos, podríen derivar en situaciones más graves al llargu plazu.
