El próximu martes, 11 de payares, a les 19 H.00’, nel Antepar de la 2ª Planta de la Escuela de Comerciu (Cai Francisco Tomás y Valiente, 1), va impartise una conferencia sol títulu Estructura y función del traxe asturianu, a cargu la Doctora n’Hestoria y Antropoloxía Fe Santoveña Zapatero.
Esta actividá ta dientro de la collaboración ente les entidaes del Atenéu Obreru de Xixón y d’ÁSTURA, pa faer una actividá mensual en redol a la promoción de la cultura asturiana.
Esti mes de payares, ufiértase un actu singular qu’une la reflexón académica cola guapura plástica d’una recreación visual: vamos falar en fondura de la indumentaria tradicional asturiana como espresión viva de la nuesa identidá.
Va analizase la estructura y la función de les prendes que se vistieron n’Asturies y construyeron la identidá asturiana. El so estudiu avéranos a un conceutu esencial: el cuerpu vistíu ye la espresión material d’una idea sobro cómo queremos ser vistos socialmente, y esa percepción algama un valor singular cuando se trata de la indumentaria identitaria d’un país.
Mientres la conferencia, un grupu de collaboradores va dir vistiéndose en públicu coles distintes pieces del traxe tradicional, nun procesu que va dexar apreciar, pasu a pasu, la riqueza de formes, texíos y colores que caractericen nuesa indumentaria más representativa.
Esta puesta n’escena, de gran plasticidá y guapura, va revelanos la técnica y la función de cada pieza, y va amosar el conxuntu estético y simbólico que nos identifica como asturianos. Elegancia, hestoria y memoria colectiva.
Trátase, a última hora, d’una oportunidá p’aprender del nuesu propiu pasáu y contemplar cómo la tradición conviértese en llinguaxe visible y actual. La identidá asturiana téxese —lliteral y emocionalmente— nes plegues de la so vestimienta.
Fe Santoveña Zapatero nació en Vibañu (Llanes) y mora anguaño n’Uviéu. Doctora n’Hestoria y Antropoloxía Social y Cultural, ye profesora d’Hestoria y Antropoloxía nel IES de Ventanielles. Ye esperta del máximu nivel n’indumentaria tradicional asturiana, tema sobro’l que tien publicaos dellos llibros y artículos ya impartió numberoses conferencies. Comisaria d’esposiciones nel Muséu del Pueblu d’Asturies, vien impartiendo dende 2014 hasta güei dellos cursos d’estensión cultural d’Antropoloxía social y cultural na mesma institución.
