- Alborecemos col cielu nuboso y dalguna gotera con unes temperatures que tan alrodiu de los 9ºC, rexistrándose nel puirtu Payares -0,9ºC.
- Güei una masa fría emburriada pol vientu del norte va apurrinos precipitaciones y xarabatos sobre too pela tarde cuando puen ser persistentes y de calter moderáu. La nieve surdirá anicialmente perriba de los 1400m pa baxar al finar el día pelos 1100m, amás nel llitoral los xarabatos puen venir acompangaos de truena y xarazu con unes temperatures en moderáu descensu.
- Mañana xueves sedrá un día pasáu por agua con xarabatos frecuentes ya intensos, sobre too na fastera más oriental onde l’aire fríu n’altor va entrar más nidiamente, na ocidental l’ausencia d’esti va facer que les precipitaciones seyan más irrelevantes. Los bastiazos tornarán a venir acompangaos de truena y xarazu pel llitoral y la nive surdirá pela cordelera perriba de los 1000m, dalgo más baxa cuantu más al este mos atopemos con unes temperatures en bultable descensu.
- Durante’l riscar del vienres seguirán los xarabatos frecuentes ya intensos con tendencia a dir espaciándose a partir del mediudía con unes temperatures que camudarán poco calteniéndose un ambiente ivernal, amás seguirá nevando copiosamente pela cordelera perriba de los 900-1000m, dalgo más baxo durante’l riscar y sobre too na fastera más oriental d’Asturies.
- El sábadu y domingu templará pero seguirá lloviendo y la nieve retrocederá perriba de los 1800m.
- Paez que’l llunes pela tarde la llegada d’una nueva borrasca pue traenos de nuevu precipitaciones abondoses y un descensu de les temperatures con nevaes na cordelera perriba de los 1000m pero esto yá lu diremos viendo.
