Estáu del tiempu: vienres 21 de payares

• Alborecemos col cielu nuboso y xarabatos intermitentes que son en forma de nieve perriba de los 700m con unes temperatures que tan alrodiu de los 6ºC, rexistrándose nel puirtu Payares -2,9ºC onde ta nevando y se fae l’usu obligatoriu de neumáticos d’iviernu o cadenes.
• Güei vamos seguir con esti tiempu ivernal con xarabatos y precipitaciones intermitentes que dirán espaciándose ya perdiendo intensidá a partir del mediudía con unes temperatures que camudarán poco, calteniéndose un ambiente fríu ya ivernal. La nieve surdirá perriba de los 700-800m y l’aire tenderá amenorgar pa quedar sele ya variable.

Mañana sábadu alboreceremos con nubes ya claros o abancios y xelando nel interior asturianu, durante la mañana dirá entrando l’aire gallegu pero sobre too pela tarde cuando templará dalgo l’ambiente, amás mos apurrirá nubosidá y la posibilidá de precipitaciones febles ocasionales.

El domingu seguiremos col vientu gallegu, amás dirá coyendo fuelle pa soplar con raches fuertes nel llitoral y zones altes faciendo que suban nidiamente les temperatures. El cielu va tar nuboso pero sin malpenes precipitaciones, sicasí na fastera surocidental sedrán probables y la nubosidá sedrá más abondosa.

El llunes un nuevu frente mos dexará precipitaciones abondoses y un descensu de les temperatures, surdiendo de nuevu la nieve na cordelera, sobre too de cara al martes cuando la cota baxará a los 1000m. pero esto yá lu diremos viendo.