- Alborecemos col cielu nuboso y precipitaciones febles con unes temperatures que tan alrodiu de los 7ºC, rexistrándose nel puirtu Payares -2,3ºC onde nieva selemente.
- Güei vamos tener el cielu mui nuboso con xarabatos intermitentes que sedrán más frucuentes ya intensos pela tarde y cuantu más al oriente mos atopemos, amás vendrán acompangaos de truena y xarazu nel llitoral y la nieve surdierá perriba de los 800-1000m, tando la cota más baxa nel estremu oriental. Les temperatures en descensu y l’aire va soplar con raches fuertes en zones altes y en puntos de la costa de componente norte-noroeste a partir de la tarde.
- Durante’l prósimu riscar seguirán los xarabatos con intensidá y frecuencia pa dir remitiendo ya espaciándose durante la mañana, seguirá nevando perriba de los 1000m y les temperatures nun camudarán, calteniéndose un ambierte fríu ya ivernal con másimes que malpenes algamarán los 10ºC. L’aire amenorgará pa quedar sele ya variable al escurecer cuando puen abrise dellos claros o abancios.
- El sábadu, dempués d’una mañana fría, entamara a soplar l’aire gallegu que templará dalgo l’ambiente, amás mos apurrirá precipitaciones al atapecer que sedrán febles en xeneral, subiendo la nieve perriba de los 1800m.
- El domingu subirán nidiamente les temperatures por mor del vientu gallegu que soplará con raches fuertes nel llitoral y zones altes, amás mos apurrirá nubosidá y precipitaciones al finar el día.
- A partir del llunes pela tarde y sobre too’l martes un nuevu temporal mos pue dexar de nuevu precipitaciones abondoses, descensu de les temperatures y nevaes significatives perriba de los 1000m na cordelera pero esto yá lu diremos viendo.
