Actualidá / La población d’Asturies crez percima de la media nacional y algama la cifra más alta dende xineru de 2019
El Principáu algamó los 1.020.009 habitantes nel tercer trimestre del añu, lo que supon una medría del 0,3%.
“Detrás de cada númberu hai hestories de vida: families que se queden, moces que tornen, persones qu’escueyen Asturies de mano de nuevu”, valora la vicepresidenta Gimena Llamedo.
L’últimu informe sobro la estadística continua de población, publicada güei pol Institutu Nacional d’Estadística (INE), reflexa qu’Asturies rexistró’l sestu mayor medría de población en términos relativos ente toles comunidaes autónomes. El Principáu va ganando habitantes dende abril de 2022 y nel últimu añu natural -dende ochobre de 2024 hasta’l mes pasáu- sumó 7.365 en total.
La vicepresidenta del Principáu, Gimena Llamedo, qu’esta mañana participó nel alcuentru informativu Asturies, tierra d’oportunidaes, entamáu pola axencia de noticia Europa Press, tamién ufiertó dellos datos relevantes sobro la evolución del censu. Asina, señaló que dende 2022 la comunidá ganó abargana de 10.00 persones. Tamién indicó que nun s’encadenaben trés años consecutivos de crecedera poblacional dende fai más d’una década nun s’encadenaben.
“Detrás de cada númberu hai hestories de vida: families que se queden, moces que tornen, persones qu’escueyen Asturies de mano de nuevu”, valoró Llamedo.
Amás, precisó que 25 conceyos amontaron la so población anguaño, ente que en 2020 solo aumentaba la población d’una decena de conceyos. “Tamién crecen más d’un terciu de les nueses parroquies y hasta un 65 % de los barrios urbanos”, amestó.
“Asturies vive un bon momentu. Asturies crez porque hai más empléu, más empreses y más oportunidaes, y eso tamién se reflexa na demografía”, señaló la vicepresidenta.
Al so xuiciu, esti cambéu respuende, ente otros factores, a polítiques coherentes como la Llei d’Impulsu Demográficu, qu’evalúa l’impactu poblacional de cada midida pública; el decretu de zonificación, qu’empobina l’ayudes escontra onde más se precisen, o’l Centru d’Innovación Territorial, qu’impulsa proyectos locales p’atraer empléu y talentu.
