RTPA / Los vecinos d’El Brañil.lín denuncies les carreres illegales, ente otros problemes que-yos afecten.
El xueves viniente abre la temporada d’esquí n’Asturies. Valgrande-Payares y Fontes d’Iviernu prepárense y miren esperanzaos el frente fríu que s’acerca. De mano ñevará los tres díes enantes de l’apertura que, amestao a lo que yá cayó, podría facer qu’inauguraren la temporada puntuales.
Valgrande-Payares encadena cinco años ensin ser esquiable’l mesmu día qu’arranca la temporada. Esti añu esa racha podría rompese. Un frente previstu ente’l martes y el miércoles podría dexar abonda ñeve pa que, amestao a lo yá acumulao, dexar l’apertura de dellos remontes. La decisión final tomaráse’l miércoles.
En Fontes d’Iviernu esmolez la lluvia y la xubida de temperatures previstes pa les hores vinientes. Sicasí, confíen nel frente fríu pa poder abrir el xueves. Ellí la decisión tomaráse’l martes.
Enagora, nes dos estaciones los aficionaos a la ñeve pudieron esfrutar del día, con raquetes, esquís o trineos.
Los vecinos d’El Brañil.lín denuncien les carreres illegales, ente otros problemes que-yos afecten
Tanto personal de la estación como los vecinos del pueblu d’El Brañil.lín, onde ta Valgrande-Payares, quéxense d’un abandonu sistemáticu de l’alministración. A la falta de saniamientu amiéstase’l mal estáu de la entrada per carretera y, sobre manera, les carreres illegales que se celebren cuando cai la nueche.
Aseguren que se lleven produciendo dende va muncho y que son un peligru pa los residentes pola escuridá qu’hai na zona. Denuncien que’l tendíu eléctricu ye vieyu, ta estropiáu y malapenes cunta con caltenimientu.
