La música n’asturianu y eonaviegu vuelve a ser protagonista cola nueva edición del Premiu Camaretá al Meyor Cantar, que se va celebrar el vienres 7 de payares a les 19:00 hores nel Teatru Vital Aza de La Pola (L.lena).
Los finalistes d’esta edición son Héctor Braga, Ferla Megía, Herbamora y Libre, y el públicu va poder disfrutar tamién del conciertu de La Bonturné, ganador del añu pasáu col tema Odisea la nuí. FINALISTES/
El premiu, ta dotáu con 6.000 euros y la participación nel circuitu Autores nel Camín, parte del programa Asturies, Cultura en Rede. La gala va emitise per RTPA y la entrada ye llibre hasta completar aforu.
Como preludiu a la mesma, presentóse’l videoclip oficial d’Odisea la nuí, realizáu por Javier Lueje, nun actu en Llaboral Ciudá de la Cultura con participación del director xeneral d’Acción Cultural, Antón García, y miembros del grupu.
LÏBRE ye un proyectu musical que naz nel 2012. Empiecen tocando versiones acústiques de rock y rematen nel discu Ciudadano Cero. Depués d’un parón participen nel proyectu «El mio cantar» (2019), lo que supón un puntu d’inflexón pal proyectu con un conceptu más averáu al rock. Nel 2025 publique l’EP Ciudadano lunar, con seis cantares que van de la canción d’autor al pop alternativu, dos d’elles escrites n’asturianu, mostrando’l compromisu de la banda pa con una de les llingües propies d’Asturies. Anguaño, Lïbre ta integrada por Falu (voz), Carlos y Óscar (guitarres), Michi (baxu) y David (batería).
Xatu, de Ferla Megía
Ferla Megía ye música tradicional, urbana y electrónica. Crea atmósferes con una variedá mui amplia de samples y inspiraciones y la so capacidá innata pa la melodía vese rematada con una puesta n’escena onde xuega con bases qu’aporten capes y que se sumen al panderu y la flauta, encargaos de tener pelos cantares. Trátase d’una figura que vive la música ensin limitaciones y, claramente, una de les más inquietes de la escena asturiana, trabayando sobre un paragües d’abondes varielles y que bebe tanto de los últimos soníos urbanos como de la música tradicional de so tierra.
Valiente, d’Héctor Braga
Héctor Braga ye un artista y productor multidisciplinar dedicáu a les músiques clásiques y de folk. Con siete discos asoleyaos hasta la fecha, pue dicise que ye ún de los referentes más afianzaos na música del país con abondes reconocencies y premios. Héctor ye una referencia nel estudiu y conocencia de la música asturiana porque tien una trayectoria granible qu’axunta’l trabayu de campu y la investigación con dos carreres superiores (música y etnomusicoloxía), un máster en comunicación, un títulu profesional de gaita y un doctoráu cum laude n’Historia del Arte y Musicoloxía.
