¿Seca en payares? La falta d’agües y la cayida de niveles de banzaos y manantiales pon a Asturies «a la llende». Les principales reserves de la rexón atópense bien per debaxo de lo habitual nesta dómina d’añu tres un mes d’ochobre con solo una cuarta parte de les precipitaciones esperaes y un payares qu’avanza secu. LNE
Los banzaos asturianos ufierten estos díes imaxes inusuales a medidados de payares, con niveles d’agua bien per debaxo del que cabría esperar por estes feches. Y los manantiales qu’abastecen a numberosos conceyos y localidaes amenorgaron considerablemente’l so caudal. Ye la consecuencia d’un llargu periodu de seca qu’Asturies vien sufriendo dende’l branu (daqué atenuáu en septiembre), acentuáu per un mes d’ochobre especialmente secu, l’octavu con menos precipitaciones dende 1964.
El banzáu de Tañes ye’l grifu d’Asturies. Con un nivel d’agua del 44% de la so capacidá, empiecen a vese yá antigües edificaciones que llevaben años somorguiaes y los vecinos preven qu’en pocos díes emerxa la ponte de la vieya carretera que permaneció ensin vese dende fai 25 años. Tañes, xuntu col banzáu de Ruseco, suministra a Cadasa la práctica totalidá de l’agua que sirve al centru d’Asturies. Al añu son 56 los hectómetros cúbicos que Cadasa apurre a los asturianos.
La capacidá total de Tañes ye de 34 hectómetros cúbicos y na actualidá alluga 19. Ruseco atopase en máximos, pero solo apurre 4 hectómetros cúbicos. L’añu pasáu por estes feches, los niveles rondaben el 75% y la midida nos postreros diez años taba percima del 65%.
Peor ye entá la situación del banzáu de Los Alfilorios, principal fonte para Uviéu. La so capacidá total ye de 8 hectómetros cúbicos y atópase al 25% (2 hectómetros cúbicos), ente que l’añu pasáu atópase al 62% y de media en diez años siempres tuvo percima de la metá.
El banzáu de Tañes, en Casu, a menos de la metá de la so capacidá
L’agua que nutre a munchos otros conceyos, como los del oriente d’Asturies, llega al traviés de manantiales. Pero’l llargu periodu de falta d’agües amenorgó los recursos. Nel pasáu mes d’ochobre rexistrarense n’Asturies una media de 37,4 llitros per metro cuadráu, casi la cuarta parte de lo esperao para esta dómina del añu.
Les elevaes temperatures y el vientu del sur que sopló sobre la rexón les últimes selmanes nun ayuden a la llegada d’agües. Y la situación en que s’atopa’l terrén fai qu’inclusive’l regresu de les nubes esmuela.
La esmolición empieza a instalase en dellos conceyos. El conceyu d’Uviéu yá acutó los baldeos d’agua y el riego en parques para tratar d’amenorgar el consumu. En conceyos como Amieva o Potes produciéronse restricciones en momentos específicos, tamién en Sobrescobiu. El problema nun ye tanto que nun esista agua para encarar el serviciu sinón que cualquier avería o fuga causa un gran problema.
Marcelino Martínez, alcalde de Sobrescobiu, conceyu que se nutre de manantiales, asegura que’l caudal amenorgóse a la cuarta parte.Miguel Ángel Fernández, alcalde de Casu, reconoz que’l conceyu ta «a la llende». «Hai munchos conceyos que nun tán faciendo nada y toos tendríamos de ser un pocu más responsables», asegura
