Asturies axunta a especialistes, alministraciones y empreses n’una cita que la consolida como referencia en gobernanza del datu. El programa, que se va desenvolver la próxima selmana, inclúi talleres, conferencies y meses redondes para reforzar l’apueste por una Alministración personalizada y con servicios públicos más eficaces y eficientes. Actualidá /
El Gobiernu del Principáu va celebrar del 1 al 5 d’avientu la Selmana del Datu, un eventu que va axuntar a alministraciones, empreses tecnolóxiques y especialistes para analizar el papel tresformador de los datos y l’intelixencia artificial nel desenvolvimientu económico y social. Esti programa va contribuyir a convertir Asturies n’una referencia nacional n’innovación y gobernanza del datu.
A lo llargo de cinco xornaes, van celebrase talleres, conferencies y meses redondes sobro cuestiones clave como la gobernanza del datu, la intelixencia artificial aplicada a les alministraciones, la ciberseguridá, la interoperabilidá y les oportunidaes que xenera la economía del datu.
Tres la puesta en marcha de la Llei Simplifica y del portal MiPrincipado, con esti eventu avanzase escontra l’oxetivu de llograr una Alministración más axilosa, proactiva y personalizada, capaz d’ufiertar servicios más eficaces y eficientes gracies al usu intensivu de datos.
Asturies asitióse nos últimos años como un referente nacional nesti ámbitu col desenvolvimientu de proyectos piqueros y cola so participación n’iniciatives europees venceyaes a los espacios de datos. Estes actuaciones dexaron atraer financiamientu y promover el desenvolvimientu de nueves aplicaciones basaes na intelixencia artificial. Esti lideralgu contribúi a ameyorar la competitividá del texíu empresarial y a fomentar la creación d’empléu cualificáu.
La organización de la Selmana del Datu cuerre al cargu de la Conseyería de Presidencia, Retu Demográficu, Igualdá y Turismu, al traviés de la Dirección Xeneral d’Estratexa Dixital ya Intelixencia Artificial. Amás, cuenta cola collaboración del Ministeriu pal Tresformamientu Dixital y de la Función Pública, al traviés de la Dirección Xeneral del Datu de la Secretaría d’Estáu de Dixitalización ya Intelixencia Artificial, lo mesmo que de múltiples entidaes y empreses arreyaes na innovación dixital. La so implicación refuerza la construcción d’un ecosistema dixital sólidu, basáu na cooperación y la tresferencia de conocencia.
L’Executivu autonómicu reafita con esta iniciativa la so visión estratéxica: convertir la información en valor, la tecnoloxía n’oportunidá y l’intelixencia artificial en ferramienta pal bienestar social y el desenvolvimientu económicu d’Asturies.
