Bonos díes.
Llámome Isa Lobo, soi asturiana de ma pongueta y pá ayerán. La mio llingua materna ye l’asturianu, amás del castellán. Dende siempres, apasionada de la llectura, aficionada a les nueves teunoloxíes y la fotografía en particular, pasión de la que viví profesionalmente unos cuantos años enantes de dedicame a l’enseñanza.
Llevo venti años trabayando como maestra, primero n’Infantil y dende va diez años en Primaria. Los últimos seis cursos pongo escuela de Llingua Asturiana nel colexu públicu Carmen Ruiz-Tilve d’Uviéu, conocíu como Corredoria3 y por trabayar ensin llibros de testu, por proyeutos. Dempués de coordinar la formación del profesoráu, actualmente soi la coordinadora de teunoloxíes educatives del centru.
“La irrupción de les nueves tecnoloxíes oblíganos
a educar d´una manera distinta”. Howard Gardner
Consciente de que l’alumnáu que tenemos nes aules son nativos dixitales
que nacieren col movimientu, la lluz y el color al traviés de pantalles…
Camiento que’l mayor desafíu que tenemos el profesoráu d’asturianu, güei en día, ye:
- emocionay y llamar l’atención pa qu’escuchen activamente,
- que muestren interés poles coses qu’asoceden nel mundu que los arrodia,
- que respeten turnos de pallabra y puedan falar/opinar toos y toes
independientemente de les sos capacidaes y singularidaes personales - qu’aprendan a desenvolvese comunicativamente colos iguales y los mayores
Oxetivu doble:
- Profesional: desarrollar un procesu d’enseñanza-aprendizaxe efeutivu y eficaz pa que los mios escolinos deprendan bien (seyan competentes comunicativamente) y pa la vida, con una utilidá.
- Personal: apasionalos col tema de la llingua asturiana pa que l’amen de por vida, que la escueyan y usen siempre que puedan, llean artículos, llibros, poemes, noticies, escuchen música, podcast, etc. Que nun tengan que xuntase a asturfalantes pa falar esta llingua milenaria, pa puxar por ella.
Pa poder afrontar con ésitu estos desafíos y cumplir el doble oxetivu ocurrióseme ya enantes de la pandemia iguar un blogue educativu.
- Nun primer momentu como soporte a les fiches, ye dicir,
pa complementar les enseñances curriculares. - Acaldía voi adecuándolu a les necesidaes y nuevos retos que van surdiendo y presentándose.
Afondando más en cómo trabayar eficientemente la competencia comunicativa en toles sos vertientes y pa faciliar sobremanera la comprensión y la espresión ocurrióseme day esti formatu de blogue con páxines estátiques (aparecen na cabecera con subpáxines…) y páxines dinámiques ordenáes cronolóxicamente: el blogue que siempres suañé facer, el que más me prestaría leer diariamente y que tuviese ese calter educativu y formativu como plus.
Equí lu tenéis, n’Edublog, ferramienta de baldre que nos ufre la Conseyería d’Educación.
https://edublog.educastur.es/ixuxu
- Ixuxú ufre un espaciu ordenáu onde atopar conteníos de tou tipu, un periódicu de referencia onde tar informaos y amás, deprender coses nueves o repasar otres ya vistes nel aula… Los conteníos nun solo tienen que ver con Asturies; les categoríes van medrando a medida que surxen nueves referencies.
- Principalmente versen sobro saberes curriculares de Llingua y Cultura asturiana, los ODS de l’Axenda 2030 y principales desafíos del sieglu XXI. El restu de saberes básicos de les enseñances de Primaria trabáyense tresversalmente, ye dicir, cualquier noticia o tema abordáu esprímise tolo qu’el mayestru desee. Por casu…
“Ye apremiante actuar.
Mañana puede ser tarde” .
“Tresformar el mundu” ye’l título de la crucial resolución aprobá por L’Asamblea Xeneral de les Naciones Unies n’ochobre de 2015, qu’inclui los Oxetivos de Desarrollu Sostenible (ODS) propios de l’Axenda 2030.
Paulo Freire recuérdanos otra finalidá educativa
a tener en cuenta a la hora d’enseñar nel aula:
«L’alfabetización ye más,
muncho más que leer y escribir.
Ye l’habilidá de lleer el mundu,
ye l’habilidá de siguir aprendiendo
y ye la llave de la puerta de la conocencia».
«Nun somos seres d’adaptación.
Somos seres de tresformamientu».
“La educación nun camuda al mundu,
camuda les persones
que van camudar el mundu”
Vamos a ello, a lleer el mundu,
a entendelu y comprendelu,
y a siguir deprendiendo,
alfabetizándonos p’algamar más y meyores conocimientos.¿Seguisme?
Tener siempres presente que:
- L’interés ye’l motor del aprendizaxe. El celebru solo apriende si hai emoción. Francisco Mora
- “Tou aquello no cual ponemos la nuesa atención adquier mayor fuerza na nuesa vida». Deepak Chopra
- “Basta mirar daqué con atención por que se vuelva interesante.” Eugeni d’Ors
- “El verdaderu arte de la memoria nun ye otru que l’arte de l’atención.” Samuel Johnson
- “L’atención regula la emoción.” Daniel Goleman
- “Basta con emprestar atención; l’aprendizaxe siempres llega cuando tas preparáu, y si tas sollerte a les señales, vas aprender siempres tou lo necesario para dar el siguiente pasu.” Paulo Coelho