{"id":76943,"date":"2026-06-12T11:57:01","date_gmt":"2026-06-12T09:57:01","guid":{"rendered":"https:\/\/edublog.educastur.es\/ixuxu\/?p=76943"},"modified":"2026-06-12T12:56:50","modified_gmt":"2026-06-12T10:56:50","slug":"lhabitu-fai-a-la-escritora","status":"publish","type":"post","link":"https:\/\/edublog.educastur.es\/ixuxu\/2026\/06\/lhabitu-fai-a-la-escritora\/","title":{"rendered":"L\u2019h\u00e1bitu fai a la escritora, por Inaciu Gal\u00e1n"},"content":{"rendered":"

<\/a><\/p>\n

Sor Canci\u00f3n \/ LNE<\/p>\n

L\u2019h\u00e1bitu fai a la escritora.\u00a0De\u00a0Xosefa Xovellanos<\/strong>\u00a0a\u00a0M\u00aa Luisa Picado Amandi<\/strong>, tres sieglos de muyeres relixoses na lliteratura asturiana. LNE<\/a><\/p>\n

<\/figcaption><\/figure>\n

<\/p>\n

\n
\n
<\/div>\n<\/div>\n<\/div>\n
\n
\n
Esti a\u00f1u la Selmana del les Lletres Asturianes dedic\u00f3se a una muyer relixosa d\u2019ente los sieglos XVIII y XIX, Taresa C\u00f3nsul<\/strong>. Dende\u2019l monesteriu benedictinu de La Vega, n\u2019Uvi\u00e9u, estren\u00f3\u2019l cam\u00edn de les muyeres nel teatru n\u2019asturianu con un entrem\u00e9s, del qu\u2019apocay\u00e1 falemos nesta columna, dedic\u00e1u a l\u2019abadesa del so conventu.<\/div>\n<\/div>\n<\/div>\n
\n
\n
<\/div>\n

Unes d\u00e9cades enantes la xixonesa\u00a0Xosefa Xovellanos<\/strong>\u00a0diba ser la primer muyer n\u2019escribir n\u2019asturianu de la que nos lleguen testos; anque escribi\u00f3 la so obra po\u00e9tica conocida enantes d\u2019entrar al conventu. Garr\u00f3 los h\u00e1bitos a los 48 a\u00f1os y rematar\u00eda los sos d\u00edes como parte de la comunid\u00e1 de les monxes agustines recoletes, en Cimavilla. Estos d\u00edes recibimos con allegr\u00eda saber que\u2019l centru educativu que constr\u00fai\u2019l Gobiernu d\u2019Asturies en Xix\u00f3n va llevar el so nome, mientres esperamos l\u2019aplicaci\u00f3n del determ\u00edn del plenu del conceyu, qu\u2019en xineru del 2024 dio mandatu a l\u2019alcald\u00eda de que la cai \u00abL\u2019Argandona\u00bb recupere\u2019l nome propiu de la escritora xixonesa, abandonando\u2019l nomatu que fai referencia al so home y del que nun tenemos referencies d\u2019usu en vida de l\u2019autora.<\/p>\n

Y\u00e1 nel sieglu XX otres muyeres relixoses dexaron la so buelga na creaci\u00f3n art\u00edstica n\u2019asturianu, casu de l\u2019ayerana\u00a0Mar\u00eda Pilar Esther Fern\u00e1ndez Fern\u00e1ndez<\/strong>, conocida art\u00edsticamente como Sor Canci\u00f3n, que nos dexaba nel 2021 a los 86 a\u00f1os. Ingres\u00f3 mui moza nel Monesteriu de les Pelayes d\u2019Uvi\u00e9u y nos a\u00f1os sesenta dex\u00f3 los h\u00e1bitos y entam\u00f3 una carrera como compositora y cantante, incluyendo m\u00fasica relixosa n\u2019asturianu ente les sos creaciones. Dex\u00f3 cinco discos, editaos ente 1962 y 1967 pola multinacional Columbia. Destaca\u2019l discu \u00abVillacincos asturianos\u00bb, con temes como\u2019l dedic\u00e1u a los Reis Magos que se fixo bien popular y qu\u2019a\u00f1os dempu\u00e9s version\u00f3\u2019l grupu \u00abNuberu\u00bb, allargando l\u2019\u00e9situ a les xeneraciones moces que tanto la sintieron nes escueles y nes cases.<\/p>\n

\n
<\/div>\n<\/div>\n

El Monesteriu nel que tuvo Sor Canci\u00f3n, que g\u00fcei acueye xunto a la comunid\u00e1 \u2013y ye bien simb\u00f3lico\u2013 el llar de l\u2019Academia de la Llingua Asturiana, edit\u00f3 en 1994 la \u00abRiegla de San Benitu\u00bb \u2013les normes poles que se rixen les benedictines\u2013 en traducci\u00f3n al asturianu. Un volume reedit\u00e1u en 2019 en collaboraci\u00f3n cola ALLA.<\/p>\n

En Colunga sigui\u00f3 esta tradici\u00f3n n\u2019a\u00f1os averaos a los de Sor Canci\u00f3n,\u00a0Belarmina Montes<\/strong>, llaica pero catequista con dotes lliteraries. \u00abBeli\u00bb, asina la llamaben nel so conceyu, edit\u00f3 en 1961 un llibru con delles de les pieces qu\u2019usaba nes sos catequesis. Son poemes y di\u00e1logos pensaos pal ense\u00f1u a los ne\u00f1os y ne\u00f1es a los que preparaba pa la primer comuni\u00f3n. En 2019, la comunid\u00e1 parroquial a la que perteneci\u00f3 reedit\u00f3\u2019l llibru \u00abDi\u00e1logos y poes\u00edas (en bable y castellano) de Navidad y Reyes\u00bb, present\u00e1u pol desapaec\u00edu cronista de Colunga\u00a0Jos\u00e9 Antonio Fidalgo<\/strong>, gracies a quien sabemos delles informaciones sobre l\u2019autora.<\/p>\n

Podemos tami\u00e9n citar a muyeres escritores, qu\u2019ensin tener esa rellaci\u00f3n tan intensa colo relixoso na so vida, tocaron la cuesti\u00f3n na so obra lliteraria, casu de\u00a0Florina Al\u00edas<\/strong>\u00a0y\u00a0M\u00aa Jes\u00fas Guardado Tom\u00e1s<\/strong>, qu\u2019apaecen na antolox\u00eda \u00abCovadonga n\u2019a poes\u00eda bable\u00bb (Amigos del Bable, 1976),\u00a0Mar\u00eda Balb\u00edn<\/strong>\u00a0o\u00a0Nen\u00e9 Losada Rico<\/strong>, ente otres.<\/p>\n

Va unes selmanes tuvi la suerte de poder visitar en Villaviciosa a la relixosa\u00a0M\u00aa Luisa Picado Amandi<\/strong>, nacida en Ribadeva en 1944. Ye l\u2019abadesa del conventu de la Pur\u00edsima Concepci\u00f3n, que pertenez a la orde de les Hermanes Clarises. Esta monxa ye continuadora de la tradici\u00f3n de muyeres relixoses na lliteratura asturiana y nel so llibru \u00abEl canto de las estrellas\u00bb, edit\u00e1u en 2009 pa recaldar fondos pa la so comunid\u00e1, recueye dos poes\u00edes relixoses n\u2019asturianu: \u00abLa Santina\u00bb y \u00abNa Fonda Ortal\u00bb. Prepara un llibru nuevu y camiento qu\u2019apurrir\u00e1 m\u00e1s sorpreses positives pa la lliteratura asturiana, dando continuid\u00e1 a un filu bien vieyu de muyeres relixoses col h\u00e1bitu d\u2019escribir lliteratura n\u2019asturianu.<\/p>\n

\n\n