Destaquen pol so tamañu y pola so llonxevidá, pero nun son eternos y la visita hai de ser ensin dexar buelga. N’Asturies, hai ocho árboles que, pola so singularidá, merecieron en 1995 y en 2003 la so inclusión na Rede Rexonal d’Espacios Naturales Protexíos so la figura de monumentu natural. Son seis texos y dos carbayos, les dos especies d’árbol que más guañaes tuvieron siempres nel paisaxe, la hestoria, la cultura y l’identidá de los pueblos asturianos.

Dalgunos son milenarios y toos suman cientos d’años. Cientos d’años nos que siempres fueron llugares d’alcuentru. Al pie del árbol más vieyu d’un llugar creáronse tradiciones, celebrábense ceremonies importantes, xestáronse lleendes y resolvíense los asuntos cotidianos de les xentes que vivíen nesi llugar. Dalgunos, o quiciabes toos, de los que cumplieron munchos sieglos de vida yá yeren árboles de cultu inclusive primero que-yos asitiaren ilesies al llau. Yá yeren árboles del pueblu, o de la tribu, inclusive primero que so les sos cañes llamen a conceyu.

N’Asturies, hai ocho árboles que, pola so singularidá, merecieron en 1995 y en 2003 la so inclusión na Rede Rexonal d’Espacios Naturales Protexíos so la figura de monumentu natural. Son seis texos y dos carbayos, les dos especies d’árbol que más guañaes tuvieron siempres nel paisaxe, la hestoria, la cultura y l’identidá de los pueblos asturianos.

En 1995 incluyérense otros dos que yá nun esisten, el Rebollu de Bermiego (Quirós) y la Fayona d´Eiros (Tinéu). Los árboles centenarios non solo nun son eternos, sinón que son bien sensibles a lo que los arrodia. Por ello, cuando se visiten ten de ser col máximu respetu posible y ensin dexa-yos nenguna buelga. Dalgunos tán perimetrados precisamente para aforrar el grave dañu que puede acarretar un continuu apatayo del suelu so la so copa.

Les característiques de los ocho árboles, que son les que se describen na información técnica de les redes d’espacios naturales protexíos d’Asturies y que podríen variar col pasu del tiempu, son les siguientes:

Texu de Bermiego (Quirós)

Texu milenariu que foi declaráu monumentu natural en 1995 y que ta asitiáu nes contornes del pueblu de Bermiego, en Quirós, al pie de la ilesia de Santa María y na falda de la sierra del Aramo. Ta consideráu unu de los más antiguos d’Asturies y ye unu de los meyor calteníos. Les sos dimensiones son 13 metros d’altor, casi 7 de diámetru normal y 15 de diámetru de copa. Foi candidatu en delles ocasiones al premiu al meyor árbol européu del añu, la postrera en 2018.

Texu de Santibáñez de la Fonte (Ayer)

Ye monumentu natural tamién dende 1995 y ta asitiáu al pie de la ilesia románica de San Juan de Santibañez, nel conceyu d’Ayer. Les sos dimensiones yeren 20 metros d’altu, 3,5 metros de diámetru normal y 15 metros de diámetru de copa. Presenta dellos daños en tueru y ramasca, polo qu’agora eses dimensiones son menores. Calcúlense-y más de 500 años.

Texu de Salas,  ta nel campusantu de la localidá

Monumentu natural dende 1995, la so singularidá débese a que ta asitiáu dientro del campusantu de Salas, delantre de l’antigua ilesia parroquial de San Martín, que ye bien d’interés cultural polos sos más de 800 años. Mide 16 metros d’altor, seis de diámetru normal y 13 de diámetru de copa.

Texu de Santa Coloma (Ayande)

Tamién ye monumentu natural dende 1995. Al so llau tien la ilesia románica de Santa Coloma, que foi construyida en 1785 sobro los restos d’otra del sieglu XIV. Calcúlase que tien más de mil años d’antigüedá, lo que-y convertiría n’unu de los más llonxevos d’Asturies. Según la ficha de monumentu natural, tien 14,5 metros d’altor y 6 metros de diámetru normal.

Texu de Pastur (Illano)

Monumentu natural dende 2003, ta allugáu xuntu al santuariu de Pastur, nes estribaciones de La Bobia, nel conceyu d’Illano. Cuando se declaró monumentu natural midía 17 metros d’altor, con 4,25 metros de diámetru y 20 metros de copa. Les envernaes casi acaben con él en 2009.

Texu de Llagu (Ayande)

Ta asitiáu al pie de la ilesia románica de Santa María, de sieglu XVIII, na aldega de Llagu, a 12 kilómetros de La Puela Ayande. Ye monumentu natural dende 1995, cuando s’estableció que tenía 16 metros d’altor, 5,25 de diámetru normal y 9 de diámetru de copa.

Carbayón de Valentín (Tinéu)

Esti exemplar de Quercus Robur ye monumentu natural dende 1995 pola so escepcionalidá: 16 metros d’altor, 10,50 de perímetru y 20 de diámetru de copa. Ta asitiáu na localidá de Valentín, en Tinéu, al pie de la capiya de San Pedro, y calcúlense-y más de 700 años.

Carbayón de Llavandera (Xixón)

Otru carbayu centenariu que ye monumentu natural dende 1995. Tien 21 metros d’altor, 6,7 de perímetru y 25 de diámetru de copa. Esta asitiáu en Tueya, na parroquia de Llavandera, en Xixón, delantre de la ilesia parroquial de Santuyano. A los repulgos del maltratu sufiertu d’antiguo claváronse-y clavos, arrincáron-y cañes, intentaron quemalu y añedieron el so allugamientu, con parte de los sos raigaños prindaos pol asfaltu de la carretera que la arredola.


Árbol de texu ¿Qué ye un Texu? El Texu ye un xéneru ye un árbol conífero, de la familia primitiva de les taxáceas, que crez en zones montascoses. Son plantes de gran llonxevidá, algamando más de 2000 años y los 20 metros d’altor. Lo más sorprendente de la so forma esterna, ye la gran grosez que puede llegar a superar el so tueru.