L’Asociación d’Escritores d’Asturiesta acabante anunciar que la escritora Carmen Ruiz-Tilve Arias ye la ganadora del XV Premiu de les Lletres d’Asturies. La entrega va producise en xineru si se dan les circunstancies sanitaries pa ello.

Ruiz-Tilve ñació’l 19 d’abril de 1941 n’Uviéu. Estudió Filoloxía Románica na Universidá d’Uviéu. La so Tesis de Llicenciatura trató sobre «El premio de novela Ciudad de Oviedo» y la so Tesis de Doctoráu foi un estudiu sobre «La obra narrativa de Dolores Medio», dambos trabayos empobinaos pol Profesor Martínez Cachero. Ye Caderalga, anguaño xubilada, de Didáctica de la Llingua y la Lliteratura na Universidá d’Uviéu, na qu’enseñó dende 1978. Ente 1980 y 1982 foi bibliotecaria, por oposición, na Facultá de Filoloxía d’esta mesma Universidá.

Al marxe de la so actividá universitaria, esplegó un ampliu llabor como articulista y como creadora, interviniendo con frecuencia en xuraos, principalmente lliterarios, y collaborando, al traviés de conferencies, charres y meses redondes, con delles instituciones y asociaciones culturales, asina n’Asturies como fuera d’ella, sopelexando les múltiples facetes de lo asturiano y uvieino.

Na so faceta lliteraria, publicó seis noveles, toes con Uviéu como escenariu, sol heterónimu de “Carbayo”: Crisantemos para todos (1994), La Edad de Oro (1995), Galería de Espejos (1998), Una Semana fuera del Calendario. (2000), espublizada enantes n’asturianu como Una Selmana fuera del Calendariu (1998), Cuentos Encadenados. (2001) y Las dos caras de Jano (2005).

Amás, asoleyó numberosos llibros d’investigación y divulgación sobre temática asturiana, como La vida comercial de Oviedo (1924-1935) a través de «Nosotros, los Rivero», La mujer asturiana en el trabajo tradicional, El Fontán, guía para nostálgicos, Alrededor de El Carbayón. El Campo se hace ciudad, Oviedo, en el Camino de Santiago, L’Uviéu de los años de posguerra (na obra colectiva Antonio García Oliveros, les palabres y los llibros), ente otros.

El so ampliu llabor como articulista na prensa asturiana mientres más de dos décades quedó compilada, nel casu de los sos “Pliegos de Cordel”, en seis tomos. Afaló y entamó, ente 2003 y 2016, el ciclu de conferencies de la Sociedá Uvieina de Festexos, alredor de la que se xeneró una avolumada y variada documentación divulgativa sobre la capital asturiana.

Recibió múltiples distinciones, ente elles el premiu Aula de Paz de la UNESCO, el Memorial «Muro de Zaro» de Comunicación 2005, la Paxarina d’Oru 2005, el V Premiu Timón (2014) y la Balesquida d’Honor (2016). Dende 2002 ye cronista oficial d’Uviéu, ciudá na qu’un colexu públicu, una cai y una sala de llectura lleven el so nome. Foi patrona de la Fundación Caveda y Nava que trabayaba pol consensu a favor de la oficialidá del asturianu. 

• Info del premiu